«Шегінерге жол жоқ»: «Қайраттың» бапкері Уразбахтин «Левскиге» қарсы ойынға дайындық жайлы айтты

Алматылық «Қайраттың» бас бапкері Рафаэль Уразбахтин матч алдындағы баспасөз мәслихатында болгариялық «Левскиге» қарсы Чемпиондар лигасының іріктеу кезеңіндегі қарымта ойыннан не күтетінін бөлісті, деп хабарлайды ASnews.kz.

«Әрине, кез келген жеңіліс, қандай болса да, көңілге қаяу түсіреді. Ойынның ең соңында гол жіберіп алғанымызды ескерсек, жігіттер алғашқы матчтың нәтижесіне қатты ренжіді. Бірақ өкінішпен қатар, олардың бойында үлкен жігер де бар. Бәрі де өз алаңымызда есе қайтаруға, сапалырақ футбол көрсетуге және өзіміз үшін оң нәтижеге қол жеткізуге жанып тұр.

Кімнің әлсіз немесе күшті екенін салыстыру дұрыс емес – бұл мүлдем екі түрлі команда. Турнирдің бұл кезеңінде барлық қарсыластар жеткілікті түрде шебер. «Левскиді» атап өтер болсақ, оларда өте жақсы трансферлер болды, құрам сапалы орындаушылармен толықты. «Левскидің» кез келген ойыншысы біздің команданы күшейте алатындай көрінеді – онда шынымен де жақсы футболшылар ойнайды.

Бізге шегінерге жол жоқ, жағдайдың өзі бізді белсендірек ойнауға мәжбүрлейді. Әсіресе шабуылда агрессивтірек әрекет етуге тырысамыз. Әрине, басымызды тасқа ұрып алға ұмтылмаймыз, өйткені қарсыластың сапында жазалай алатын өте шебер әрі жылдам ойыншылар бар. Шабуыл мен қорғаныс әрекеттерінің арасындағы тепе-теңдікті сауатты бөлу керек.

Ал көгалдың жағдайына келсек, мен әлі алаңға шығып көрген жоқпын. Бірақ біздің агроном осында келіп, алаңның жақсы жағдайда болатынына сендірді», – деді маман.

Іріктеудің алғашқы ойынында «Қайрат» Софияда «Левскиге» 0:1 есебімен жол беріп, кездесудің соңында португалиялық Сержиньюден жалғыз голды жіберіп алған болатын.

Жауапты кездесу 11 тамыз күні «Түркістан Аренада» өтеді.

«Левскидегі» қазақ Чемпиондар лигасындағы «Қайратқа» қарсы матчқа күтпеген болжам жасады

«Алаңға шықпай футбол көргім келмеді»: Чесноков «Хартстан» неге кеткенін түсіндірді