«Валенсияның» экс-футболшысы: ҚПЛ-дағы ең үздік қорғаныс – «Каспийде»

«Каспий» шабуылшысы Ноа Ндомбази ASnews.kz тілшісіне берген сұхбатында маусымды қысқаша қорытындылады.

– Өткен чемпионаттағы мақтан тұтатын ойыныңызды атасаңыз.

– «Ордабасыны» 3:2 есебімен жеңген матч.

– Мүлдем ұмытқыңыз келетін немесе қайта өткізгіңіз келетін ойын?

– «Ұлытаумен» болған алғашқы кездесу. Матч барысында көптеген қауіпті сәттер жасағанымызбен, 0:1 есебімен жол беріп қойдық.

– Қай команданың қорғанысы ең үздік?

– Әрине, «Каспийдің». Сәтті күндері біздің қорғаушылар өте-өте мықты. Сондай-ақ бұл қатарға «Қайрат» пен «Ордабасыны» қосар едім.

– Қазақстанда сізді жағымды және жағымсыз жағынан не таңғалдырды?

– Адамдардың қарым-қатынасы қатты ұнады. Келер алдында бұл ел туралы ештеңе білмедім және не күтерімді де түсінбедім. Бірақ өте қонақжай, құрметтей білетін және ақкөңіл халықты кездестірдім. Минустардан – тек тілдік кедергіні айтар едім: кейде түсінісу қиынға соғып жатады.

– Басқа командаға ауысуыңыз мүмкін бе?

– Уақыты келгенде басқа да нұсқаларды қарастырамын, бірақ қазір бар назарым тек «Каспийге» аударылған.

Еске салсақ, Ноа Ндомбази биылғы жылдың наурыз айында украиналық «Кривбасс» клубынан «Каспийге» ауысқан болатын. 25 жастағы вингер 29 матчқа қатысып, алты гол соқты және екі нәтижелі пас берді.

Айта кетейік, бұған дейін франциялық ойыншы «Бордо» және «Валенсия» сияқты танымал клубтарда өнер көрсеткен. Сондай-ақ ол өз елінің жасөспірімдер құрамасының намысын қорғаған.