«Ұшып кетпеуіміз керек»: Сәтпаевтың «Бернлидегі» бапкері команданың жағдайы туралы айтты

Англиялық «Бернлидің» бас бапкері Фабио Челестини «Кардифф Ситиден» жеңілген матчтан кейін қазақстандық шабуылшы Дастан Сәтпаев өнер көрсететін ұжымның Чемпионшиптегі орнын сақтап қалу үшін күресуге мәжбүр екенін мойындады, деп хабарлайды ASnews.kz.

15-тур матчында «Бернли» сырт алаңда «Кардиффке» қарсы кездесуде жеңісті қолдан шығарып алды. 64-минутқа дейін Челестини командасы 4:1 есебімен сенімді түрде алда келе жатқан еді, алайда қалған 29 минутта қатарынан төрт доп жіберіп алып, 4:5 есебімен есе жіберді.

Бұл жеңіліс «Бернли» үшін кезекті соққы болды: маусымның алғашқы 15 турында команда небәрі бір жеңіске жетіп, қазір аман қалатын 21-орыннан бес ұпайға қалып келеді. Салыстырмалы түрде айтсақ, чемпионат басталмай тұрып «Бернли» премьер-лигаға жолдама алатын басты фавориттердің бірі саналып еді.

«Қазір біз шындыққа тура қарап, команданың лигада қалу үшін күресіп жатқанын мойындауымыз керек. Біз бұл шайқасқа дайын болуға және бар күшімізді салуға міндеттіміз. Алда аянбай жұмыс істеуге екі апталық үзілісіміз бар. Мүмкін, осы уақытқа дейін мұндай сөздерді айтудан қашқан болармыз, бірақ турнирлік кесте бәрін айтып тұр. Бұл ойыншылар үшін де, бапкер үшін де ащы шындық. Бізге бірге болу керек, егер лигадағы орнымызды сақтаудан басқа нәрсе туралы ойлайтын болсақ, бұл үлкен қателік болады», – деді Челестини BBC Radio Lancashire эфирінде.

Клубтың жағдайы кадрлық мәселелермен, оның ішінде шабуыл шебіндегі қиындықтармен де ауырлай түсуде. «Бернлидің» 18 жастағы қазақстандық шабуылшысы Дастан Сәтпаев 2026 жылдың қараша айының басында санның артқы бұлшықетін қайта жарақаттап алды.