«Ерекше ойын болды»: «Қызылжар» легионері Қазақстанмен тең ойын туралы пікір білдірді

Фарер аралдары құрамасы мен петропавлдық «Қызылжардың» жартылай қорғаушысы Йоаннес Бьярталид ASnews.kz тілшісіне берген сұхбатында Ұлттар лигасының алғашқы матчында Қазақстанға қарсы өз алаңындағы тең ойыннан (1:1) алған әсерімен бөлісті.

«Иә, бұл біз үшін жақсы ойын болды деп ойлаймын. Егер қайсыбір команда жеңіске лайық болса, ол – біз. Мүмкін олар допқа көбірек иелік еткен шығар, бірақ біз екінші гол соғатын қауіптірек сәттер мен жағдайлар жасай алдық. Әрине, біз допты көбірек бақылауда ұстап, прессингке белсендірек барғымыз келді. Бірақ бір ұпай – бұл қалыпты жағдай. Ұлттар лигасының басындағы алғашқы ойында тең түсу – қолайлы нәтиже. Алда әлі бес матч бар. Біз Қазақстанның жақсы командасына қарсы бір ұпай еншіледік. Біз бұдан да зорынан үміттенген едік, бірақ бұл апат емес.

Әрине, бұл матч мен үшін ерекше болды. Қазақстанда тұрып жатқаныма 7–8 ай болғандықтан, қазақстандық құрамадағы кейбір жігіттерді танимын. Сөзсіз, бұл ойынға ерекше мән берді, бірақ одан артық емес. Бұл – ұлттық құрамалар матчы. Басқа кез келген кездесудегідей, мен толығымен өз әрекеттеріме және командамның ойынына назар аудардым.

Бұл топта біздің мүмкіндігіміз жақсы, бірақ ол өте тығыз, деңгейлес командалар жиналған. Мүмкін, Словакия төрттіктің ең үздік командасы ретінде ерекшеленетін шығар, бірақ соған қарамастан, қалған барлық матчтарда біздің тамаша мүмкіндіктеріміз бар деп санаймыз. Біз алаңға шығып, тек жеңіс үшін ойнайтын боламыз», – деді Бьярталид.

Еске сала кетейік, Ұлттар лигасының С дивизионындағы Фарер аралдары мен Қазақстан құрамаларының алғашқы матчы 1:1 есебімен тең аяқталды. Қазақстандық Премьер-лигада петропавлдық «Қызылжар» сапында өнер көрсететін 28 жастағы фарерлік жартылай қорғаушы Йоаннес Бьярталид алаңға негізгі құрамда шығып, толық матч өткізді.

Турнир аясында Фарер аралдарының құрамасы өзінің келесі матчын Молдоваға қарсы өткізеді, ал Қазақстан ұлттық командасы топ фавориті – Словакия құрамасымен ойнау үшін сырт алаңға аттанады.

«Ауа райы да, алаң да қиын болды»: Қазақстан құрамасының дебютанты Фарердегі тең ойын туралы