Матч орталығы
«Қазақстан Бельгиямен тең дәрежеде ойнай алады»: «Генк» ойыншысы Косово қақпасына соққан голы туралы
18 қараша, 20:08

Фото: Шахмұрат Дәулетов
Бельгиялық «Генк» клубының шабуылшысы Шахмұрат Дәулетов ASnews.kz сайтына берген сұхбатында Қазақстан U19 жасөспірімдер құрамасы сапындағы алғашқы оқу-жаттығу жиыны мен іріктеу кезеңінен алған әсерімен бөлісті.
«Ұзақ айлар бойы күткеннен кейін ұлттық құрамаға шақырту алу – әрине, өте жағымды сезім. Мен бұл күнге ұзақ дайындалдым, көп еңбектендім және өз мүмкіндігімді күттім, сондықтан қазір осында болып, ел намысын қорғағаныма ерекше қуаныштымын. Бұл одан да зор жігермен жұмыс істеуге үлкен мотивация береді.
Бельгия сияқты командалармен күресуге болады және күресу керек. Менің ойымша, біз әлдеқайда мықты болдық, бірақ сәл ғана бірдеңе жетіспеді. Бұл мәселені шешу қажет. Мұндай құраммен біздің кез келген қарсыласты жеңуге шамамыз жетеді», – деді Дәулетов.
Еске сала кетейік, Шотландия (1:3) мен Бельгиядан (0:2) жеңілгеніне қарамастан, Қазақстан жасөспірімдер құрамасы Евро-2027 іріктеуінің үшінші кезеңіне жолдама алды. 17 жастағы Шахмұрат Дәулетов Косовоға қарсы өткен шешуші матчта (1:0) жеңіс голының авторы атанды.
Осы жылдың қазан айында оң қапталдағы вингер Кевин Де Брёйне мен Тибо Куртуа сияқты жұлдызды түлектерімен танымал бельгиялық «Генк» клубымен кәсіби келісімшартқа отырған болатын.
Әлишер Аманжол