«Ауа райы да, алаң да қиын болды»: Қазақстан құрамасының дебютанты Фарердегі тең ойын туралы

Қазақстан ұлттық құрамасы мен алматылық «Қайраттың» 18 жастағы шабуылшысы Исмаил Бекболат ASnews.kz тілшісіне берген сұхбатында Ұлттар лигасы аясында сырт алаңда Фарер аралдарына қарсы өткен матчтағы (1:1) дебютінен кейінгі әсерімен бөлісті.

Дебют, ауа райы және қарсылас туралы

«Дебют жасағаныма өте қуаныштымын, керемет әсер алдым. Ал матчқа келер болсақ, ойын өте ауыр өтті. Ауа райы да, алаң да қиындау болды. Бізге қарсы ойнаған команда өте жақсы дайындалған, нағыз кәсіпқойлар екенін көрсетті».

Командаласы Азамат Тұяқбаевпен бірге құрамаға шақырылуы және командадағы атмосфера туралы

«Мұнда бірге болғанымыз өте керемет. Бірақ мәселе тек досымның жанымда болғанында ғана емес, командадағы барлық үлкен-кіші ойыншылар бізді қолдады. Олар бізге: «Өз ойындарыңды ойнаңдар», – деді. Киім ауыстыратын бөлмеде бұрыннан бірге ойнап жүргендей өте жақсы қарым-қатынас орнады».

Алдағы Словакиямен өтетін матч туралы

«Келесі Словакияға қарсы ойында, бұйырса, үш ұпайға қол жеткіземіз деп үміттенемін».

Еске сала кетейік, Джон ван 'т Схиптің бастауындағы Қазақстан құрамасының Ұлттар лигасындағы алғашқы матчы сырт алаңда тең нәтижемен аяқталды – 1:1. Ойын барысында басымдық екі командаға алма-кезек ауысып отырды: 14-минутта айып алаңына асырылған допты қақпа маңдайшасының астына дәл бағыттаған Фарер аралдарының ойыншысы Аки Самуэльсен есеп ашса, көп ұзамай 26-минутта Темірлан Ерланов бұрыштамадан берілген допты баспен қақпаға бағыттап, таразы басын теңестірді. Екінші таймда алаң иелерінде жеңісті жұлып әкететін бірнеше мүмкіндік болғанымен, оны жүзеге асыра алмады.

Ұлттар лигасының С дивизионы аясында Қазақстан құрамасы өзінің келесі матчын 29 қыркүйекте өткізеді – команда сырт алаңда топ фавориті саналатын Словакия құрамасына қарсы ойнайды.