Матч орталығы
«Молдовадан жеңілгеннен кейін жыладым»: Әліп Ван ‘т Схиптің жұмысы мен қалаулы бапкер туралы айтты
18 қараша, 18:39

Фото: Нұралы Әліп
Қазақстан ұлттық құрамасының вице-капитаны Нұралы Әліп команданың Ұлттар лигасындағы сәтсіз өнер көрсетуі мен нидерландтық маман Джон ван ‘т Схиптің кетуі туралы ашық сұхбат берді, деп хабарлайды ASnews.kz.
«Ван ’т Схиптің құрама тізгінін ұстағандағы нәтижелері аянышты болды. Оның басшылығымен біз өз әлеуетімізді аша алмадық. Ал өз алаңымызда Молдоваға есе жіберген сәтте көз жасымды тоқтата алмадым. Енді ұлттық командаға кім бас бапкер болатынын білмеймін. Өйткені мұны бізге тек соңғы сәтте ғана айтады ғой. Жеке өзім команданы Талғат Байсуфинов немесе Магомед Әдиев басқарса екен деп ойлаймын. Талғат ағамызға жұмыс істеуге тиісті жағдай жасалмады, сол себепті ол кісі кетіп қалды. Ал егер Магомед Әдиев қайтып келсе, жігіттер қайтадан бірігіп, біртұтас командаға айналар еді. Ол – ойыншылардың көзіндегі отты жаға алатын маман. Егер бапкер болып Әдиев келсе, мен тек қана қуанар едім», – деді футболшы журналист Ермұхаммед Мәуленге берген сұхбатында.
Еске сала кетейік, Джон ван ’т Схип 2026/2027 жылғы УЕФА Ұлттар лигасының аяқталуына байланысты Қазақстан ұлттық футбол құрамасының бас бапкері қызметінен кетті. Нидерландтық маман команданы 2026 жылдың тамыз айында төрт айлық келісімшартпен басқарған болатын. Оның жетекшілігімен құрама Ұлттар лигасының C дивизионында алты матч өткізіп, бірде-бір жеңіске жете алмады (3 тең ойын, 3 жеңіліс) және Словакия, Фарер аралдары мен Молдова бар топта соңғы орынды иеленді.
Қазақстан футбол федерациясы (ҚФФ) қазіргі уақытта Еуропа чемпионатының алдағы іріктеу цикліне арналған жаңа ұзақмерзімді бапкерді іздеу жұмыстарын бастады.
Дастан Сәтпаев Ұлыбританиядағы қазақстандық студенттер кешіне қатысты: фото
Әлім Динасылов