Матч орталығы
«Оқжетпес» легионері еурокубокке шығудың басты факторын атады
19 қараша, 08:21

Фото: Борис Лотоцький
Көкшетаулық «Оқжетпестің» украиналық қорғаушысы Борис Лотоцький ASnews.kz сайтына берген сұхбатында команданың ҚПЛ-2026 қорытындысы бойынша төртінші орын алып, Конференция лигасына жолдама алуына не себеп болғанын түсіндірді.
«Шынымды айтсам, маусымның басында еурокубокке шығу туралы сөздерді аса шынайы бағаламадым және өзімізге ондай мақсат қойып көрмеппін. Алдымызда матчтарды сапалы өткізіп, кем дегенде өткен жылғы нәтижеден төмен түспеу міндеті тұрды. Ал дәл осылай болады деп... Маусым басында мұндайды ойламаппыз да. Бірақ уақыт өте келе команда бір-біріне үйренісіп, алаңда бірімізді-біріміз шын мәнінде түсіне бастаған сәтте, дәл осы фактор еврокубок аймағына енуде шешуші рөл атқарды.
Бүкіл команда бірігіп, бір отбасыға айналды. Әрбір ойыншы бүкіл дистанция бойы барынша зейін қойып, ойыннан ойынға қарай алға жылжуға жақсы мағынада құлшынып тұрды. Бұл біздің жетістігіміздің басты іргетасы болды. Әрбір адам серіктесінің дамуына, ойнауына және нәтижеге қол жеткізуіне көмектескен ұйымшыл ұжым қалыптасты», – деді Лотоцький.
Еске сала кетейік, өткен ҚПЛ маусымының қорытындысы бойынша Ринат Алюетовтің жетекшілігіндегі «Оқжетпес» тарихи төртінші орынды иеленіп, УЕФА Конференция лигасының іріктеу кезеңіне жолдама жеңіп алды.
23 жастағы қорғаушы чемпионатта 28 матч өткізіп, бес гол соқты және бір нәтижелі пас берді. Бұған дейін журналист Эльдар Аманбаев көкшетаулық клуб басшылығы Лотоцькиймен келісімшартты ұзарту жөнінде келісімге келгенін хабарлаған болатын.
Әлім Динасылов