«Осындай ойын болады деп ойламадық»: Карпович «Тобылды» жеңгені және Оразовтың бабы туралы

«Елімай» бас бапкері Андрей Карпович ASnews.kz тілшісіне берген сұхбатында «Тобылды» жеңгеннен кейінгі (2:0) өзекті сұрақтарға жауап берді.

– «Тобылдың» Алматыдағы ойсырай ұтқанын ескерсек («Қайраттан» 4:1), бүгінгі ойын сіздер үшін айтарлықтай қауіпсіз өтті. Еш шығынсыз жеңіске жетеміз деп күттіңіз бе? Жігіттердің ойынына қаншалықты көңіліңіз толады?

– Бұл бөлек матч. «Тобыл» – тәжірибелі бапкері бар, өте білікті команда екенін түсіндік. Оларда түрлі лигаларда ойнаған тәжірибесі мол жақсы ойыншылар бар, бірақ біз бұл Алматыдағыдан бөлек ойын болатынын білдік. Дайындалдық және жоспарды жүзеге асырдық.

Әрине, дәл осылай болады деп ойлаған жоқпыз, бірақ тек оң нәтиже үшін келдік. Қала күнінде (Семей 308 жылдығын тойлап жатыр – ред.) жеңіске жетіп, үш ұпай алу маңызды болды. Барлығы біздің ойдағыдай өрбіді. Жігіттер тамаша өнер көрсетті. Ойыншылар құрамы, ойын сапасы мен мазмұны жағынан «Тобыл» қазіргі орнына лайық емес екені анық. Еурокубоктарға қатысқан осындай қарсыласты жеңу одан да жағымды әрі мәртебелі. Бұл бәрібір топ-команда.

– Оразов ұзақ үзілістен кейін алаңға толық оралды. Рамазан ойын қарқынына қаншалықты ілесіп кетті?

– Ол нәтижеге жетуде маңызды рөл атқарды. Ол біз үшін мықты менталитеті мен үлкен құлшынысы бар аса маңызды футболшы екенін жасырмадық, үнемі айтып жүрдік. Әрине, еурокубоктарда және чемпионатта бізге Оразов қатты жетіспеді, сондықтан оралғанына қуаныштымыз.

Әзірге ол мінсіз бабынан алыс, бірақ бүгін бар күшін салды. Екінші голға қатысып, алға бағытталған нәтижелі пас берді – жалпы, ауқымды жұмыс атқарды. Бұл ұлттық құрама үшін де үлкен плюс. Біз көп ойландық, уайымдадық, бірақ Рамазан өз сенімділігімен бізге рух беріп, өзінің ұлттық құрама ойыншысы екенін көрсетті.

– «Елімай» кездесу барысында 15 рет ереже бұзды – бұл «Тобылдан» екі есе көп. Мұндай дөрекі ойын немен түсіндіріледі?

– Жеңіске деген құштарлықпен. Мұндағы алаң қиын. Мен жігіттерге алаңның әрбір сантиметрі үшін таласуымыз керектігін айттым және бұл бізге көп допты жеңіп алуға мүмкіндік берді. Егер жекпе-жек нәтижесінде допқа ие болсаң, онда басымдық сенде болады. Ережені бұзу туралы ешқандай арнайы ой немесе жоспар болған жоқ.

Бәрі үлкен құлшыныстан туындады. Бұл – спорт. Бір жағынан, ереже бұзу тым көп, бірақ жеңіс осылай жұлып алынады.

Еске сала кетейік, ҚПЛ-дың 27-туры аясындағы сырт алаңдағы матчта «Елімай» Фессу Плакка мен Айбар Жақсылықовтың голдарының арқасында «Тобылды» жеңді. Осылайша, 45 жастағы қазақстандық маман Андрей Карповичтің командасы турнир кестесінде алтыншы орынға табан тіреді.

«Уразбахтин – сайқымазақ»: Григорий Бабаян Рафаэль Уразбахтинге жауап берді