Башич «Астанадан» кетуі мүмкін: футболшыға франциялық клуб та көз тікті

Қазақстан чемпионаты аяқталғаннан кейін Иван Башичтің «Астанадан» кету ықтималдығы арта түсті. 24 жастағы футболшыға Еуропаның үш клубы көз тігіп отыр, деп хабарлайды ASnews.kz BH Gol басылымына сілтеме жасап.

Олардың қатарында қазіргі уақытта Сергей Якирович жаттықтыратын Англияның «Халл Сити» клубы бар. Бұдан бөлек, Италияның «Удинезе» және Францияның «Страсбург» командалары да босниялық футболшыны өз қатарына қосуға ниетті.

Қаңтардағы трансферлік кезеңнің басталуына әлі біраз уақыт бар. Сондықтан осы аралықта жартылай қорғаушыға қызығушылық танытатын басқа клубтардың пайда болуы ғажап емес.

Иван Башичтің «Астанамен» келісімшарт мерзімі 2026 жылдың 31 желтоқсанына дейін жарамды. Демек, клуб футболшыны жақын арада сатпаса, жыл соңында оны тегін жіберуге мәжбүр болады. Бұл жағдай келіссөздерге тікелей әсер етіп, тараптардың шешім қабылдауын жеделдетуі ықтимал.

«Астана» Қазақстан Премьер-лигасындағы маусымды 54 ұпаймен үшінші орында аяқтап, келесі жылы Конференция лигасының іріктеу кезеңінде ойнауға мүмкіндік алды.