«Оқжетпестің» украиналық қорғаушысы: келесі маусымда командада қалғым келеді

«Оқжетпес» қорғаушысы Борис Лотоцький ASnews.kz сайтына берген сұхбатында Қазақстан премьер-лигасының қола жүлдесіне бір қадам жетпей тоқтаған көкшетаулық клуб үшін тарихи маусымды қорытындылады.

– Борис, чемпионаттың осы бір тартысты соңғы кезеңі сіз және команда үшін қалай өтті?

– Чемпионаттың соңы біз үшін сәтті әрі табысты болды дер едім. Иә, бұл аралықта ең жақсы ойындарымызды көрсете алмаған кездер де болды, десе де өз алаңымыздағы жеңістер сериясы мен Семейге жасаған соңғы сапарымыз бізді де, жанкүйерлерді де тек қуантады.

– Қорытындысында қола жүлдеге тек доп айырмашылығының жетпей қалғаны өкінішті ме?

– Шынымды айтсам, бұл түрлі сезімдер тудырады. Бір жағынан, біз осы маусымда орасан зор жұмыс атқардық: бүкіл чемпионат бойы тұрақты түрде үздік бестікте болдық және Көкшетау мен «Оқжетпес» үшін тарих жаздық. Біз мұнымен мақтана аламыз. Екінші жағынан, қола жүлдеден тек доп айырмашылығы немесе бір ұпай ғана бөліп тұрса, әрине, өкінішті. Бірақ біз қолда бар нәтижеге қуаныштымыз және жеткен жетістігімізбен мақтанамыз.

– Сіздің келісімшартыңыз жыл соңында аяқталады. Мансабыңыздағы болашағыңызға қандай факторлар әсер етеді және келесі кезеңді қалай елестетесіз?

– Алдын ала болжам жасағым келмейді. «Оқжетпес» пен бапкерлер штабы маған өсіп-өнуім, ойнауым және жақсарып, тұрақты әрі сенімді болуым үшін бәрін берді. Сондықтан мен жай ғана команда емес, отбасы деп айтуға болатын осындай ұжымда әрі қарай да қуана жұмыс істер едім.

23 жастағы украиналық қорғаушы өткен ҚПЛ-2026 маусымында «Оқжетпес» сапында 28 матч өткізіп, бес гол соқты және бір нәтижелі пас берді. Көкшетаулық клуб 54 ұпай жинап, қосымша көрсеткіштер бойынша ғана «Астанаға» жол беріп, қорытынды төртінші орынға табан тіреді.

Егер Қазақстан Кубогының финалында «Ордабасы» «Қайсарды» жеңетін болса, «Оқжетпес» 2027 жылы УЕФА Конференция лигасының іріктеу кезеңінде ойнау құқығына ие болады.