«Жігерлі ойынға көңілім толады»: «Қайрат» форварды Гуаль – ЧЛ-дан ұшуы туралы

Алматылық «Қайраттың» испаниялық шабуылшысы Марк Гуаль ASnews.kz сайтына берген сұхбатында Чемпиондар лигасының іріктеу кезеңінде софиялық «Левскиге» қарсы өткен қарымта матчты (0:1) қорытындылап, Еуропа лигасы плей-офф раундынан не күтетінін айтты.

«Біз бәрін байқап көрдік, мүмкіндіктеріміз болды, бірақ оны пайдалана алмадық. Ал қарсылас өз мүмкіндігін мүлт жібермей гол соқты, кейін өте сауатты қорғанды. Олар шынымен де жақсы матч өткізіп, позициялық ойынды өте шебер құра білді. Меніңше, біз алаңда бар күшімізді салып, қолдан келгеннің бәрін жасадық. Ойыншылардың жігерлі ойынына көңілім толады, бірақ нәтиже үшін өкінемін. Бізге алға жылжу керек – қазіргі ең маңызды нәрсе осы.

Еуропа лигасы ма? Кімге қарсы ойнайтынымызға қарамастан, әдеттегідей дайындалуымыз керек. Егер еурокубоктарда өнер көрсеткің келсе, тек өзіңе және күнделікті жұмысыңа назар аударуың қажет. Еуропада үлкен клубтармен бәсекелесуге тура келеді – футболдың мәні де осында: әр матчта бәсекеге қабілетті болу. Неғұрлым мықты қарсыластармен ойнасақ, біз үшін соғұрлым жақсы. Мықты командаларға қарсы әлі де көп матч өткіземіз деп үміттенемін», – деді Гуаль.

«Қайрат» Түркістанда «Левскиге» 0:1 есебімен жол беріп (екі кездесудің жалпы есебі – 0:2), Чемпиондар лигасының іріктеу кезеңінен шығып қалды.

Алматылық клуб өз өнерін Еуропа лигасы іріктеуінің плей-офф раундында жалғастырады, онда турнирдің негізгі кезеңіне жолдама алу үшін ПАОК—«Андерлехт» жұбының жеңімпазымен таласады.

«Алматыда тек «Реалға» ғана ұтылғанбыз»: «Қайрат» қорғаушысы – ЧЛ-дан ұшуы мен келесі қарсылас туралы

«Қайрат» жартылай қорғаушысы Еуропа лигасындағы келесі қарсыласын бағалады

«6 сағат ұшу – нағыз жындылық»: «Левски» вингері Эвертон – «Қайратты» жеңгені туралы

«Алматыда басқаша болар еді»: «Қайрат» қорғаушысы Африко – ЧЛ-дан ұшып кетуі мен Түркістандағы ыстық туралы