Роналду мансабын «Әл-Наср» сапында аяқтауға шешім қабылдады

Португалиялық шабуылшы Криштиану Роналду саудиялық «Әл-Насрдан» кетуді көздеп отырған жоқ және бутсысын шегеге дәл осы клубта ілуді жоспарлап отыр, деп хабарлайды ASnews.kz 365Scores Arabic басылымына сілтеме жасап.

Жақын арада 41 жастағы шабуылшы команда басшылығымен кездеседі. Тараптар ойыншының алдағы жоспарларын және келісімшартты тағы бір маусымға ұзарту мүмкіндігін талқылайды.

Бұл ақпарат португалиялық жұлдыздың клубтан кететіні туралы соңғы сыбыстарды жоққа шығаратыны атап өтілді.

Еске сала кетейік, Роналду Сауд Арабиясы чемпионатында 2023 жылдан бері өнер көрсетіп келеді. Оның «Әл-Насрмен» қолданыстағы келісімшарты 2027 жылдың жазында аяқталады.

Сонымен қатар, 2026 жылдың 5 қарашасында 41 жастағы Криштиану Роналду халықаралық мансабын аяқтағанын ресми түрде мәлімдеген болатын. Ол Португалия құрамасы сапында 234 матч өткізіп, 146 гол соққан.

Бұл шешімнің алдында жанжал орын алған еді: қыркүйек айында Норвегияға қарсы өткен матчта бапкер шабуылшыны алаңға қосалқы құрамнан шығармады. Осыдан кейін футболшы команданың оқу-жаттығу базасынан өз бетімен кетіп қалып, Португалия футбол федерациясының Тәртіптік кеңесінен 255 еуро көлемінде айыппұл алды.