«Алматыда басқаша болар еді»: «Қайрат» қорғаушысы Африко – ЧЛ-дан ұшып кетуі мен Түркістандағы ыстық туралы

Алматылық «Қайраттың» бразилиялық қорғаушысы Лукас Африко ASnews.kz сайтына берген сұхбатында Чемпиондар лигасының үшінші іріктеу кезеңінде болгариялық «Левскиге» қарсы өткен қарымта матчқа (0:1) қатысты пікір білдірді.

«Біз матчтың ауыр болатынын білдік. Кеше біз Софиядағыға қарағанда әлдеқайда жақсы ойнадық. Тырмыстық, мүмкіндіктер жасадық, бірақ доп қақпаға кірмей қойды. Әрине, өкінішті, біз мүлдем бұны қаламаған едік. Бірақ еңсемізді түсірмеуіміз керек – алдымызда үлкен болашақ күтіп тұр. Алдымен бізді «Ұлытауға» қарсы чемпионат ойыны күтіп тұр, содан кейін біз назарымызды Еуропа лигасының іріктеуіне толықтай аударамыз.

Алаң ба? Шынын айтқанда, көгалдың сапасы онша емес. Әрине, біз Алматыдағы өз стадионымызда ойнағымыз келді – ол жерде атмосфера мүлдем басқа, оны бәрі біледі. Түркістанда өте ыстық, әрбір ойыншы бұл ауа райын өз басынан өткерді, ойнау оңай болған жоқ. Бірақ бұл сылтау емес. Дегенмен Алматыда бәрі 100 пайыз басқаша болар еді.

Мартыновичтің жоқтығы ма? Александр біз үшін өте маңызды, ол – біздің капитанымыз және алаңда өте көп көмектеседі. Бірақ ол ойнай алмаған кезде басқа футболшылар шығады, әркім дайын болуы тиіс. Біз барымызды салдық, жақсы жұмыс атқардық және бірінші матчқа қарағанда жақсырақ ойнадық, бірақ жеңіске жете алмадық. Алда бізді маңызды ойындар күтіп тұр, енді соларға назар аударуымыз керек», – деді Африко.

«Қайрат» екінші матчта да «Левскиге» тура сондай 0:1 есебімен жол берді (екі кездесудің жалпы есебі — 0:2).

«Левски» Чемпиондар лигасы іріктеуінің плей-офф кезеңіне өтті, ал алматылық клуб өз өнерін Еуропа лигасының плей-офф раундында жалғастырады. Топтық кезеңге шығу үшін «Қайрат» ПАОК—«Андерлехт» жұбының жеңімпазымен таласады.

Еурокубоктық бәсекелерге дейін Рафаэль Уразбахтиннің шәкірттері 15 тамыз күні клуб академиясының стадионында «Ұлытауға» қарсы ҚПЛ матчын өткізеді.

«Ұлттық құрама бапкері әсер етті»: «Бенфика» футболшысының неліктен «Қайратқа» ауыспағаны белгілі болды