«6 сағат ұшу – нағыз жындылық»: «Левски» вингері Эвертон – «Қайратты» жеңгені туралы

Софиялық «Левскидің» бразилиялық вингері Эвертон Бала ASnews.kz сайтына берген сұхбатында Чемпиондар лигасының үшінші іріктеу кезеңінде алматылық «Қайратқа» қарсы өткен қарымта матчты (1:0) қорытындылап, Түркістандағы ойыннан алған әсерімен бөлісті.

«Матч өте ауыр болды, негізі мұндай деңгейдегі кез-келген ойын оңай өтпейді. Бірақ біз өз алаңымызда да, қонақта да өте жақсы кездесулер өткіздік деп есептеймін. Қазақстанда оңай болмайтынын білдік, дегенмен өзімізді ең жақсы қырымыздан көрсеттік. Енді ең бастысы – демалып, жеңіс пен келесі раундқа шығуымыздан ләззат алу, содан кейін барып келесі матчтарға дайындалу.

Стадион мен алаңның сапасы? Түркістанда бәрі басқаша. «Қайраттың» Алматыдағы аренасы ерекше еді – ол жақта таулар бар, ал мұнда тау жоқ (күлді). Атмосфера да мүлдем басқа. Шынында да, бұл жердегі алаң сапасы онша емес еді, бірақ бізге жағдайға бейімделу керек болды және біз мұны жасадық. Біз бәріне дайын едік.

Келесі қарсылас па? Грекияның АЕК клубы – өте күшті команда. Алаңда бізге кім қарсы тұрса да, әрдайым дайынбыз. Жақсылап қалпымызға келіп, отбасымызбен уақыт өткізіп, миымызды сергітіп, алдағы ойындарға толықтай назар аударуымыз керек. Ауыр болады, бірақ осы кезеңге дейін жеткен екенбіз, демек бойымызда шеберлік пен сапа бар.

«Левски» жанкүйерлері – нағыз жындылар! Софиядан Түркістанға дейін 6 сағат ұшып келу... Келіп, оларды трибунадан көргенде, бұл нағыз шабыт сыйлады. Біздің жанкүйерлер керемет, олар клубты жан-тәнімен сүйеді. Мұндай адалдықтары үшін оларды жеңіспен, келесі раундқа шығумен қуанта алғанымызға қуаныштымыз. Олар бұған әбден лайық», – деді Эвертон Бала.

Софиялық «Левски» «Қайратты» екі рет 1:0 есебімен жеңіп (Болгарияда да, Түркістанда да), Чемпиондар лигасы іріктеуінің плей-офф раундына шықты. Турнирдің негізгі кезеңіне жолдама алу үшін болгариялық команда грекиялық АЕК-ке қарсы ойнайды.

Алматылық «Қайрат» Чемпиондар лигасындағы жорығын аяқтап, еурокубоктағы жолын Еуропа лигасының плей-офф раундында жалғастырады, онда ПАОК—«Андерлехт» жұбының жеңімпазына қарсы кездесу өткізеді.

«Алматыда басқаша болар еді»: «Қайрат» қорғаушысы Африко – ЧЛ-дан ұшып кетуі мен Түркістандағы ыстық туралы