«Норвич» «Бернлиді» талқандады: Сәтпаев Англияда алғаш рет толық матч өткізді

Чемпионшиптің 3-туры аясындағы матчта «Бернли» сырт алаңда «Норвич Ситиден» 1:4 есебімен ойсырай ұтылды, деп хабарлайды ASnews.kz.

Алаң иелері сапынан Мохамед Туре мен Андре Брукс дубль жасап көзге түсті. «Бернлидің» жалғыз голын Джош Лоурент соқты, алайда 77-минутта жартылай қорғаушы екінші сары қағазын алып, командасын азшылықта қалдырды.

18 жастағы қазақстандық шабуылшы Дастан Сәтпаев Чемпионшип матчында «Бернлидің» бастапқы құрамында алғаш рет алаңға шығып, толық 90 минут өнер көрсетті.

Үш турдан кейін «Норвич» маусымдағы алғашқы үш ұпайын жинап, лайв-кестеде 15-орынға көтерілді. Еншісінде бір ұпайы ғана бар «Бернли» 22-орынға төмендеді.

Қазақстандық форвард үшін бұл кездесу ағылшын клубының сапында бастан-аяқ ойнаған алғашқы толыққанды матч болды. Бұған дейін ол «Вест Бромвичке» қарсы ойында қосалқы құрамнан қосылып 33 минут өткізсе, «Брэдфорд Ситиге» қарсы кубоктық бәсекеде 80-минутта алмастырылған еді.