Хаби Алонсо Австралиядағы «Челси» жастарына таңдай қақты: олардың арасында Дастан Сәтпаев та бар

«Челсидің» бас бапкері Хаби Алонсо Сиднейдегі жолдастық кездесулер алдында өткен баспасөз мәслихатында журналистердің сұрақтарына жауап беріп, негізгі құраммен бірге австралиялық турнеге аттанған академияның жас ойыншыларын ерекше атап өтті. Бұл топтың қатарында 17 жастағы қазақстандық шабуылшы Дастан Сәтпаев та бар.

Испаниялық маман жас таланттардың өзі үшін жағымды тосынсый болғанын жасырмады:

«Шынымды айтсам, бұрын оларды соншалықты жақсы білмейтін едім, бірақ олар мені шынымен таңғалдырды. Өте жас екендіктеріне қарамастан, бойларында жоғары шеберлік пен сапа бар – бұл болашақта дамытуға болатын тамаша жобалар. Уақытымызды бірге тиімді өткізіп жатырмыз», – деді Алонсо.

Сондай-ақ «көктердің» бапкері жастарға сенім артудан қорықпайтынын және команданы белсенді түрде жаңартып, дамытуды жоспарлап отырғанын баса айтты. Ал жаттығуларда бар күш-жігері мен құштарлығын көрсете білген кез келген ойыншыға негізгі құрамның есігі ашық.

Бұл – Дастан Сәтпаев үшін өзін көрсетуге берілген тамаша мүмкіндік: турне аясында «Челси» «Уэстерн Сидней Уондерерс» (28 шілде) және «Тоттенхэмге» (1 тамыз) қарсы ойнайды. Осыдан кейін, тамыз айында кәмелет жасына толған соң, Дастан лондондық клубпен ресми түрде келісімшартқа отырады.

Сәтпаевқа еріп Еуропаға кете ме? ҚПЛ-2026 маусымының басты таланты Жасұлан Әмір не білеміз?