«Челси» шектеуге байланысты 13 ойыншыдан арылады. Дастан Сәтпаевтың жағдайы не болмақ?

Лондондық «Челсиде» Хаби Алонсоның басшылығымен қайта құру жұмыстары жүріп жатыр. Ағылшын Премьер-лигасының регламентіне байланысты клуб құрамды 38-ден 25 адамға дейін қысқартуға міндетті.

ASnews.kz сатылымдар мен жүздеген миллион фунтқа келген жаңа ойыншылардың 17 жастағы қазақстандық шабуылшы Дастан Сәтпаевтың позициясына қалай әсер ететінін сараптайды.

АПЛ-дың қатаң лимиті: 25 орынға 38 ойыншы

Абыройлы L’Equipe басылымының хабарлауынша, қазіргі уақытта Хаби Алонсоның қарамағында келісімшарты бар 38 футболшы бар – бұл бүкіл Премьер-лигадағы ең үлкен құрам.

Дегенмен, АПЛ регламенті қатаң: маусымға арналған өтінім 25 ойыншымен шектелген. «Челси» жаңа маусымда еурододасыз қалғандықтан, мұндай артық жүкті ұстап тұрудың еш мәні жоқ. Алонсо кем дегенде 13 футболшыны трансферге шығаруға немесе жалға беруге мәжбүр.

Сәтпаев үшін бәсекелестік

Лондондықтардың негізгі құрамынан орын алуға тырысып жүрген Дастан Сәтпаев үшін бұл маусымашар кезең шешуші рөл атқармақ. Бір жағынан, «көктер» шабуыл шебіне қымбат ойыншыларды алып жатыр:

• Морган Роджерс – «Астон Вилладан» £117 млн-ға жазғы рекордтық бағамен сатып алынды;
• Жеовани Кенда – «Спортингтен» келген 18 жастағы португалиялық вингер;
• Марко Палестра – «Аталантаның» оң жақ қорғаушысы/латералі.

Екінші жағынан, лимитке байланысты клуб Сәтпаевтың тікелей бәсекелестерімен қоштасуға дайын. Тізімге жас шабуылшылар ілікті: Марк Гиу, Лиам Делап, Дейвид Вашингтон және Николас Джексон. Осы ойыншылар тобының кетуі қазақстандық футболшыға тікелей жол ашады – егер Дастан жазғы матчтарда өзін жақсы жағынан көрсетсе, Алонсо оны негізгі құрамда қалдыруы немесе Еуропаға сапалы жалға беруі мүмкін.

Гарначоның кетуі, Забарный мен Алекс Скотт бойынша инсайд

Клуб жалақылық қорды жеңілдетіп жатқанда (сондай-ақ қорғаушылар Бадиашиль, Чалоба, Дисаси мен қақпашы Йоргенсен де кетуге дайындалып жатыр), басшылық нарықтағы белсенділігін тоқтатпауда:

• Алехандро Гарначо кетеді: «Челси» аргентиналық футболшыны «Астон Виллаға» £43 млн-ға міндетті түрде сатып алу шартымен жалға берді.
• Илья Забарный (£57 млн): ПСЖ қорғаушысына АПЛ-ға оралу нұсқасы ұсынылды. Оның мүддесін Мало Гюстоның ісін жүргізетін агенттік қорғайды.
• Алекс Скотт (£64 млн): «Көктер» «Борнмуттың» 22 жастағы хавбегін сатып алу әрекеттерін тоқтатар емес.

Сәтпаев үшін негізгі мүмкіндік

Аустралия мен Азиядағы маусымашар турне – Сәтпаев үшін таптырмас мүмкіндік. Клуб ротациядағы 13 ойыншыдан жаппай арылып жатқан жағдайда, «Қайраттың» 17 жастағы түлегінде Хаби Алонсоға топ-клуб деңгейіндегі өзінің шеберлігін дәлелдеуге нақты мүмкіндік бар.

Гонконг, Джакарта немесе Сидней: Дастан Сәтпаев «Челси» сапында қайда дебют жасайды?

Бос әңгіме: Дрогба Сәтпаевты мақтаған ЖОҚ және Алонсодан оны «Челсиде» қалдыруды сұраған ЖОҚ