ҚФФ Астанада баланың басына қақпа құлаған төтенше жағдайға қатысты пікір білдірді

Қазақстан футбол федерациясы (ҚФФ) 10 тамызда Астанада орын алып, баланың ауыр жарақаттануына әкеп соқтырған оқиғаға қатысты ресми мәлімдеме жасады, деп хабарлайды ASnews.kz.

«Қазақстан футбол федерациясы орын алған оқиғаға байланысты терең алаңдаушылық білдіреді. Алдын ала мәліметтер бойынша, жаттығу сабағы кезінде баланың үстіне футбол қақпасы құлаған. Зардап шегуші медициналық мекемеге жеткізіліп, оған барлық қажетті медициналық көмек көрсетілуде. ҚФФ ауруханамен байланыста отыр, баланың жағдайын жіті бақылап, оған және оның отбасына қолдау білдіреді.

Оқиға орын алған футбол алаңын ҚФФ жекеменшік футбол мектебіне жаттығу сабақтарын өткізу үшін жалға берген болатын. Қазіргі уақытта федерация оқиғаның барлық мән-жайын анықтап, нысан мен құрал-жабдықтардың техникалық жай-күйіне ішкі тексеру жүргізіп жатыр. ҚФФ сонымен қатар барлық қажетті ақпаратты ұсынуға және құзыретті органдарға оқиғаның себептерін анықтауға көмектесуге дайын», – деп мәлімдеді ұйым өкілдері.

Төтенше жағдай 10 тамыз күні кешкі сағат 19:30 шамасында болған. Қақпаның құлауы салдарынан 2017 жылы туған бала зардап шегіп, оған шұғыл госпитализация қажет болды.

Бұған дейін спорт журналисі Аслан Каженов баланың реанимацияда жатқанын хабарлап, ҚФФ басшылығын спорт нысанындағы қауіпсіздікке құқықтық баға беруге шақырған болатын.

ҚФФ Футбол үйіндегі төтенше жағдай: тоғыз жасар баланың басына қақпа құлап кетті