ҚФФ Футбол үйіндегі төтенше жағдай: тоғыз жасар баланың басына қақпа құлап кетті

Астанада Қазақстан футбол федерациясы (ҚФФ) орналасқан Футбол үйінің аумағында қайғылы жағдай орын алды – баланың басына футбол қақпасы құлап кеткен, деп хабарлайды ASnews.kz спорт журналисі Аслан Қаженовке сілтеме жасап.

«Қазір маған Астанадағы Футбол үйінде, яғни Қазақстан футбол федерациясы орналасқан ғимаратта баланың басына қақпа құлап, реанимацияға түсті деген ақпарат түсіп жатыр. Мендегі бар мәлімет бойынша, оқиға кеше шамамен сағат 19:30-да болған және 2017 жылғы өрен зардап шеккен. Қазір бәрі ең болмаса оның тірі қалуын тілеп отыр.

Өкінішке орай, нақты ақпарат ала алмай далмын. Футбол федерациясының баспасөз қызметіне хабарлассам: «Әзірге білмейміз, сұрап көргізейік, кейін хабарласайық» деп, мені жай ғана «отфутболить» етіп жіберді. Мынау не масқара? Оны неге жасырасыздар? Істі жылы жапқыларыңыз келе ме? Қайғылы оқиғаға не себеп болды және кім жауапты? Егер футбол федерациясының ғимаратында осындай жағдай болып жатса, басқа алаңдардағы қауіпсіздік қандай?» – деп жазды Қаженов өзінің әлеуметтік желідегі парақшасында.

Журналистің мәліметінше, оқиға 10 тамыз күні кешкі сағат 19:30 шамасында Астанадағы ҚФФ аумағында болған. Зардап шеккен 2017 жылғы бала шұғыл түрде ауруханаға жеткізіліп, қазір реанимацияда жатыр.

Қаженовтың мәлімдемесі жарияланған сәтте Қазақстан футбол федерациясы тарапынан осы оқиғаға қатысты ешқандай ресми түсініктеме немесе хабарлама жасалған жоқ.