«Нафтан» басшысы – Қазақстаннан келген жаңа футболшылар туралы: тәртіпті кәсіпқой жігіттер

Беларусьтің «Нафтан» клубының төрағасы Игорь Латош ASnews.kz сайтына берген сұхбатында қазақстандық шабуылшылар Вадим Яковлев пен Марлен Аймановтың трансферлері туралы айтып берді.

Қазақстандықтарға деген ықылас немен түсіндіріледі?

«Кадр мәселесі – кез келген команда үшін жанды жер. Мәселені өз түлектеріңнің есебінен шешуге болады деген пікір бар, бірақ тәжірибе көрсеткендей, әртүрлі ел өкілдерінің қосындысы оң нәтиже береді. Мен әртүрлілік пен мультикультурализмді қолдаймын.

Қазақстандықтарға және жалпы шығыс бағытына келер болсақ, ондағы адамдардың адалдығы, тәртібі мен мінезі мені әрқашан баурап алатын. Бұл қасиеттер дәл осы Яковлев пен Аймановқа тән. Олар – тек матчтарда ғана емес, жаттығуларда да 100% күш салатын кәсіпқойлар.

Вадик бізге қыста келді, біз бірден оның жанарындағы отты байқадық. Оның қуаты мен жылдамдығы көрініп тұр. Ал Марлен өзінің функционалымен және дене бітімімен (шабуылшының бойы – 1,91 м – ред. ескертпесі) баурап алды», – деді 45 жастағы басшы.

«Атырауда» тұрақтамады, бірақ Беларусьте ойнап кетті

«Барлық футболшының «өз уақыты» болады. Сен клубқа ауысуың мүмкін, бірақ бірдеңе дұрыс болмай жатады: ұжым, бапкер немесе жеке өмірлік жағдай. Ең бастысы – ойыншыға еркіндік беріп, оның күшті жақтарын пайдалану. Мысалы, Яковлев – сол аяғы жақсы жетілген, анық байқалатын вингер.

Вадим алаң жиегінде алдап өтуден қорықпайды, ал ауырлық орталығының төмендігі арқасында қорғаушыларға қиындық тудырады. «Нафтанда» ол алаңда өзін осылай ұстай алатынын сезінді. Біз көктен жұлдыз алып жатқан жоқпыз – қысқы трансферлік кезең тіпті сәтсіз өтті.

Сапалы келісімшарттар аз болды. Сондықтан Вадик пен басқа да бірнеше жігіттің осында қалғанына ризамыз. Енді оған қысымсыз есейіп, даму керек. Маған олардың Прановичпен өзара түсіністігі ұнайды».

Факт: маусымда «Астананың» 22 жастағы түлегі қатарынан үш матчта нәтижелі пас берді.

«Нафтан» – жарыс кестесінің соңында: мәселе неде?

«Басты мәселе кадрларда болып тұр – кейбіреулер жоғары дивизион үшін әлі дайын болмай шықты. Қазір бізге тактикалық тұрғыдан да, психологиялық тұрғыдан да көмектесе алатын тәжірибелі жігіттер керек. Маңызды шешім қабылдай алатындар: есепті арттыру немесе ұстап тұру және т.б.

«Нафтанға» тағы 3-4 футболшы қосылуы тиіс. Орталық жартылай қорғаушыны, сондай-ақ орталық және қапталдағы қорғаушыларды қарастырып жатырмыз. Трансферлік терезе 9 тамызда жабылады, сондықтан уақыт бар. Біз жағдайды дәл осы жаңа футболшыларды алу арқылы жақсарта аламыз», – деп қосты ол.

Еске сала кетейік, Вадим Яковлевтен командаға қыста қосылса, 27 жастағы орталық шабуылшы Марлен Айманов «Нафтанға» шілде айында қосылды. Бұған дейін ол «Тұран» сапында өнер көрсетіп, алты ойында бір гол соққан еді.

14 турдан кейін Новополоцк клубы Беларусь жоғары лигасының жарыс кестесінде БАТЭ-ден үш ұпай қалып, 16-шы орында келеді.