«Мақсатым – құрамаға ілігу»: Қазақстандық футболшы Араб Әмірліктері Кубогын жеңіп алды

«Эмирейтс» клубының 20 жастағы орталық қорғаушысы Рашид Джавабра U-21 Біріккен Араб Әмірліктері Кубогының иегері атанды, деп хабарлайды ASnews.kz.

Қазақстандық футболшы жасөспірімдер арасындағы ел Кубогының финалына қатысты. Онда «Эмирейтс» ұжымы «Аль-Васл» командасын сенімді түрде (2:0) ұтты. Бұған дейін Рас-эль-Хайма қаласының командасы турнирден атақты «Аль-Айн» клубын (2:1) шығарып жіберген болатын.

Джавабра БAӘ-де дүниеге келген, бірақ балалық шағын Талдықорғанда өткізген және Қазақстан азаматтығы бар. Ол жергілікті «Болашақ» және «Жетісу» сапында өнер көрсетіп, кейін испаниялық «Эспаньол» академиясында тәлім алған.

2025 жылы қорғаушы «Эмирейтс» клубына қосылды. Оның негізгі командасы қазір жоғарғы дивизионға жолдама алу үшін күресіп жатыр. Клубтағы танымал ойыншылардың қатарында «Ноттингем Форесттің» экс-форварды Ларс Велдвейк және «Бенфика» түлегі Диогу Капитау бар.

Биылғы маусымда Джавабра чемпионатта 25 матч өткізіп, Кубокта бір гол соқты: «Ендігі міндетім – жастар құрамасына шақырту алу», – деді ол.