«Генктің» қазақстандық шабуылшысы дубль жасады: чемпион болу үшін бір-ақ ұпай қажет

«Генк» академиясының 16 жастағы шабуылшысы Шахмұрат Дәулетов «Беерсхоттың» жастар командасына қарсы жолдастық матчқа қатысты, деп хабарлайды ASnews.kz.

Қазақстандық футболшы өзінің бұрынғы клубына қарсы спаррингте 60 минут өнер көрсетті. Бұл кездесу «Генктің» 4:1 есебімен тіркелген ірі жеңісімен аяқталды. Оң қанат вингері екі гол соғып, бір нәтижелі пас берді.

Голдардың бейнекескіні

Айта кетейік, біріншіліктің аяқталуына үш тур қалғанда Дәулетовтің командасы «Стандард», «Андерлехт», «Антверпен» және «Брюгге» клубтарын басып озып, турнир кестесінде көш бастап тұр. Чемпиондықты ресми түрде рәсімдеу үшін оларға небәрі бір ұпай қажет.

Естеріңізге сала кетейік, футболшы ықтиярхат алу рәсімдеріне байланысты Бельгия аумағынан шыға алмайтындықтан, Қазақстан құрамасы сапында уақытша өнер көрсетіп жүрген жоқ.