«Енді мен әрі ойыншы, әрі бапкермін»: Қазақстан құрамасының экс-шабуылшысы мансабын екінші лигада жалғастырады

Қазақстан құрамасы мен «Қайраттың» бұрынғы шабуылшысы Бауыржан Тұрысбек ASnews.kz сайтына берген сұхбатында екінші лигадағы жаңа тәжірибесі туралы айтып берді.

«Біз «VPR» командасымен екінші лигаға қатысуға өтінім бердік. Дәл қазір жарақатыма байланысты алаңға шыға алмаймын, бірақ бапкер және жастарға тәлімгер ретінде көмектесіп жүрмін. Бұған дейін командамен Мәскеуге барып, медиалигаға қатыстық, ал енді бұл – кәсіби деңгей.

Бұл бастамадан тек жігіттер ғана емес, жалпы Қазақстан футболы да пайда көреді: жергілікті футболшылар қаншалықты көп тәжірибе жинаса, соншалықты жақсы», – деді Тұрысбек.

Чемпионаттың бірінші турында «VPR» (бұрынғы атауы – «Впорядке») «Жеңістің» жастар командасымен тең түсті (2:2). Бұған дейін ұжым Қазақстан МФЛ финалисі, сондай-ақ Қырғызстандағы осындай турнирдің жеңімпазы атанған болатын.

34 жастағы Бауыржан Тұрысбек «Қайрат», «Тобыл», «Жетісу» және «Тараз» сапындағы ойындарымен танымал. Ол ұлттық құрама сапында 14 матч өткізіп, үш гол соққан.