«Леванте» шабуылшысы Қазақстан U-19 құрамасының матчтары туралы: cырқаттануыма байланысты ойнай алмадым

«Леванте» қосалқы командасы мен Қазақстан U-19 құрамасының шабуылшысы Алдияр Нұрғали ASnews.kz тілшісіне берген сұхбатында Еуропа чемпионатының элиталық іріктеу кезеңі қарсаңында сырқатанып қалғаны туралы айтып берді.

«Оқу-жаттығу жиыны кезінде қатты ауырып, бес күн төсек тартып жаттым. Шамасы, қандай да бір вирус жұқтырып алсам керек. Аяққа тұрғаннан кейін де қатты жөтелдің кесірінен дұрыс тыныс ала алмай, соның салдарынан толыққанды жаттығу жасай алмадым.

Уақыт өте келе жағдайым жақсара бастады, бірақ физикалық тұрғыдан әлсіреп қалған едім. Осы жағдайға байланысты бапкерлер штабы маған үміт артқанымен, командаға өзім жоспарлағандай көмектесе алмадым», – деді 18 жастағы вингер.

Айта кетейік, соңғы циклде Қазақстан жасөспірімдер құрамасы үш матч өткізді: Румынияны ұтқанымен (2:0), Украина (0:3) және Солтүстік Ирландияға (0:1) жол берді. Осылайша, команда A5 тобында үшінші орынға тұрақтады.

«Леванте» академиясының қапталдағы шабуылшысы Алдияр Нұрғали ұлттық құрама сапында екі матчқа қатысып, алаңда жалпы алғанда 35 минут қана өнер көрсетті. Биылғы маусымда ол клуб деңгейіндегі ойындарда сегіз гол соққан.