Қазақстан U-17 құрамасының бапкері: Аустриямен тең түскенімізге көңілім толды – мінез көрсеттік

Қазақстанның 17 жасқа дейінгі (U-17) жасөспірімдер құрамасының бас бапкері Бауыржан Сағындық ASnews.kz порталына берген сұхбатында Еуропа чемпионатының элиталық іріктеу кезеңіндегі Аустрияға қарсы ойынды (0:0) қорытындылады.

«Бұл жақсы ойын болды. Мен футболшыларға толықтай көңілім толады және олардың алаңдағы жанкештілігіне алғыс айтамын – олар нағыз мінез көрсете білді. Алаңнан ойыншы қуылғанына қарамастан, команда жинақылықты сақтап қалды. Аустрияға қарсы мұндай нәтиже бізді қанағаттандырады», – деді маман.

Еске салайық, бірінші турдағы матч тең есеппен аяқталды. Ойын барысында команда капитаны Расул Әкімов алаңнан қуылған болатын.

28 наурыз күні Қазақстан жасөспірімдер құрамасы Хельсингер қаласында Данияға қарсы ойнайды.