Испанияда қаралымда болған қазақ шабуылшысы – словакиялық клубқа көшуі жайлы: еңбекқорлығыммен көзге түстім

Испаниялық «Мальорка Б» клубының қаралымында болған шабуылшы Еламан Оспанғали ASnews.kz сайтына берген сұхбатында словакиялық «Славияға» көшу жайлы айтып берді.

– Сіз «Славия» клубына қалай келдіңіз? Сізді кім байқап қалды және кім клубқа шақырды?

– «Славияға» қаралымға аттандым. Нақты кімнің байқағанын білмеймі, бірақ негізінен алаңдағы еңбекқорлығым, шабуылдағы белсенділігім және қажет кезде өз қапталымдағы қорғанысқа жиі көмек бере алатындығым әсер етті деп ойлаймын.

– Словакияның екінші двизионында футбол деңгейі қандай?

– Чемпионаттың деңгейі өте жақсы деп айта аламын. Футболдың қарқыны жоғары, шетелдік ойыншылар қыруар және алаңдағы күрес те аса көп. Жалпы лиганың деңгейі өте жоғары.

– Transfermarkt порталында «Славия» ойыншысы ретінде тіркеліп тұрсыз, алайда клуб тізімінде және ойыналды құрамда жоқсыз. Бұған не себеп?

– Қазір шынымен де «Славия» ойыншысымын. Алайда виза рәсімдеу үрдісін дұрыстап жүрмін. Сондықтан клуб тізімінде көрінбеуімнің басты себебі де осы, яғни – құжат мәселесі.

Айта кетейік, 20 жасар Еламан Оспанғали ақпанда кошицелік «Славия» ойыншысы атанды. «Тобыл» жасөспірімдер командасы сапында QJ League жарысында 13 ойынға қатысып, тоғыз гол салған.