ҚФФ экс-қызметкері: Байсуфинов тұрғанда құрамаға ортаңқол шетелдіктің не керегі бар?

ҚФФ бұқаралық футбол департаментінің бұрынғы директоры Асқар Әбілдаев ASnews.kz тілшісіне берген сұхбатында Қазақстан құрамасының Ұлттар лигасындағы өнеріне баға берді.

«Қандай ерлігі үшін?»

«Жігіттерге ешқандай өкпем жоқ. Құраманың бұрынғы ойыншысы ретінде мұның қандай ауыр еңбек екенін жақсы түсінемін. Бірақ ешкімге таныс емес бапкерді шақыру сұрақ тудырады. Түсінемін, Ван ’т Схип Арменияны жаттықтырды, бірақ онда да дәл осындай нәтижелер болған. Ол не ұтты?

Талғат Маруанұлы сияқты өзіміздің жергілікті маман тұрғанда ортаңқол шетелдікті тағайындаудың қажеті жоқ еді. Футболды түсінетін кез келген адам оның өз орнында болғанын растайды», – деді 55 жастағы функционер.

Тұяқбаевтан Әмірге дейін: бас командадағы жаңа есімдер

«Біз буын алмасуының куәгері болып отырмыз. Бұрынғы көшбасшылардың орнын жастар басуда, оларға әзірге тәжірибе жетіспеуі мүмкін. Ең бастысы, олардың бойынан құлшыныс байқалады, енді соны ойын тәртібімен нығайту керек. Соңғы матчтарға қарасақ, кейде команда зейінін жоғалтып алып жатады.

Қазіргі футболшылардың энергиясын дұрыс бағытқа бұру ғана қалды, ал бұған дәл осы Байсуфинов қабілетті еді. Ол әрқайсысын бастан-аяқ жақсы біледі. Ең маңыздысы, біздің психологиямыз бен менталитетімізді түсінеді, ал Ван ’т Схипте ондай жоқ. Нидерландылық маманға да қиын: ұжымды зерттеп-білуге уақыты мүлдем аз қалған болатын».

Қақпашыны нақтылайтын кез келді ме?

«Бапкердің әлеуетті ойыншыларды командаға қосып жатқаны ұнады – жігіттер алаңда қысылмайды. Дегенмен, қақпашыларды ауыстыра беруді құптамаймын. Ақыл айтатындай емеспін, бірақ бұл маңызды ресми матчтар екенін ұмытпайық – қақпада ең мықты №1 тұруы керек», – деп мәлімдеді Әбілдаев.

Еске салсақ, Ұлттар лигасының топтық кезеңіндегі төрт ойынның қорытындысы бойынша Қазақстан құрамасының еншісінде бірде-бір жеңіс жоқ. 62 жастағы Джон ван ’т Схиптің командасы Словакия, Фарер аралдары және Молдовамен бір топта соңғы орында келеді.

Асқар Әбілдаев 2015-2016 жылдары ҚФФ-да қызмет еткен. Әр жылдары «Шахтер», «Каспий» және «Астана» клубтарын басқарған, сондай-ақ Қазақстан футзал қауымдастығының президенті болған.

«Тобыл» қызметкері ҚФФ-ға тергеуге шақырылды