«Футбол – біздің негізгі жұмыс емес»: Қазақстанмен тең ойнаған Фарер құрамасының ойыншысы ағынан жарылды

Фарер аралдары құрамасының сол қаптал вингері Аки Самуэльсен Қазақстанға қарсы тең ойыннан (2:2) кейін ASnews.kz тілшісінің сұрақтарына жауап беріп, матч нәтижесі, алаңнан қуылған ойыншы және командаластарының футболдан тыс жұмыстары туралы айтып берді.

– Аки, алдымен ойынды қорытындылап өтсеңіз. Бүгінгі нәтижеге көңіліңіз тола ма?

– Жоқ, көңілім толмайды. Біз үш ұпай алуымыз керек еді. Жақсы ойнадық, екі гол соқтық. Бұл жеңіске жету үшін жеткілікті болуы тиіс еді. Бірақ амал не, қызыл қағаз алдық. Соның кесірінен екінші таймда үлкен қысымға ұшырадық. Дегенмен, бұл ойында жеңіске жетуіміз керек еді деп есептеймін.

– Екінші сары қағаз күмән тудырған жоқ па? Ол сәтті өзіңіз көрдіңіз бе?

– Нақты көрмедім. Бірақ егер бұл тактикалық фол болса, онда сары қағаз берілуі орынды. Толық көрмегендіктен, төрешінің шешімімен келісуге тура келеді.

– Командаласыңыз құрамадағы 4-5 ойыншының футболдан бөлек басқа да жұмысы бар екенін айтты. Бұл рас па? Олар немен айналысады?

– Иә, бұл рас. Фарер аралдарында кейбір жігіттер футболды басқа жұмыспен қатар алып жүреді. Нақты кімнің немен айналысатынын білмеймін, бірақ олардың негізгі жұмысы бар екені рас.

– Бұл стадион мен алаңда ойнау қандай әсер қалдырды? Даладағы суық мұнда мүлдем сезілмейді екен.

– Бәрі тамаша. Стадион жақсы, алаңның сапасы да қалыпты. Сондықтан маған ұнады.

– Қазір сіздерде төрт ұпай бар. Бұл қаншалықты жақсы нәтиже және екінші орын алып, В лигасына шығу мүмкіндіктерін қалай бағалайсыз?

– Негізі бір ойында жеңіске жетуіміз керек еді, бірақ қазіргі жағдайымыз да жаман емес. Келесі матчта жеңіске жетсек, екінші орын алуға және келесі кезеңге өтуге мүмкіндігіміз бар. Бәрі өз қолымызда.

– Бұл топтағы ең қиын күнтізбе сіздерде сияқты. Өз алаңдарыңызда ойнап, сосын Қазақстанға ұзақ ұшу ойыншыларға қысым мен шаршаңқылық әкелмеді ме?

– Қысым болды деп айта алмаймын. Әрине, ұзақ ұшу шаршатады, бірақ бәрі дұрыс болды. Бүгін бойымызда энергия жеткілікті болды, сондықтан бұл үлкен мәселеге айнала қойған жоқ.

Еске сала кетейік, УЕФА Ұлттар лигасының төртінші турында Қазақстан құрамасы өз алаңында Фарер аралдарымен 2:2 есебімен тең түсті. Аки Самуэльсен ұлттық құрамасының негізгі құрамында алаңға шығып, 82 минут ойнады.

«Қазақстанды жеңуіміз керек еді»: Бьорталид – Ұлттар лигасындағы тең ойын жайлы