Матч орталығы
Роман Мұртазаев Қазақстан құрамасына неліктен шақырылмай кеткенін түсіндірді
21 қараша, 08:39

Фото: Роман Мұртазаев
Семейлік «Елімайдың» шабуылшысы Роман Мұртазаев Қазақстан ұлттық құрамасына не себепті шақырту алмай кеткенін түсіндіріп, команданың қазіргі буынына баға берді, деп хабарлайды ASnews.kz.
«Талғат Маруанұлы (Байсуфинов – еск.) мені шақырған кезде, тіпті жиналыста қолымды алып: «Қайта оралуыңмен, біз төлқұжаттағы сандарға қарамаймыз, жасың маңызды емес – бабыңда болсаң, ойнайсың», – деген еді. Бірақ бәріне ойын тәжірибесі әсер етеді. Құрамаға алаңда көбірек уақыт өткізетін әрі бабы жақсы ойыншыларды шақырады. Ал мен қосалқы құрамда отырғандықтан, көбірек ойнайтын футболшыларға басымдық беріледі. Арнайы қоштасу шақыртуы болған жоқ, бірақ бас бапкер солай шешсе, оны қайта көндіру мүмкін емес – нәтиже беретін де, сол үшін жауап беретін де өзі», – деді Мұртазаев.
Футболшы сондай-ақ құраманың қазіргі құрамы туралы пікір білдірді, онда Ислам Чесноков, Ғалымжан Кенжебек және Дастан Сәтпаев сияқты жас ойыншылар маңызды рөл атқара бастаған.
«Қазір буын жасарып келеді, басқа футболшылар келуде. Бірақ әзірге нәтиже жоқ. Нәтиже болған кезде бірдеңе айтуға болады, өйткені бәрі басқа көрсеткіштерден үміттенеді, алайда белгілі бір жағдайларға байланысты әзірге оған қол жеткізе алмай отырмыз», – деп қосты шабуылшы «Футбол Жолы» YouTube-арнасына берген сұхбатында.
Еске сала кетейік, Роман Мұртазаев биылғы маусым айында Армения (1:1) мен Мажарстанға (1:3) қарсы жолдастық кездесулерге Қазақстан құрамасына қайта оралған болатын, алайда УЕФА Ұлттар лигасының кейінгі матчтарына шақырту алған жоқ. Жалпы, форвард ұлттық команда сапында 26 ойын өткізіп, үш гол соқты және үш нәтижелі пас берді.
«Елімай» шабуылшысы Карповичтің кетуі туралы: бұны ешкім күтпеген еді
Әлім Динасылов