Қазақстан құрамасының Молдовадан жеңілуіне кінәлілер табылды

Танымал комментатор әрі журналист Ермұхамед Мәулен Қазақстан құрамасының Ұлттар лигасы матчында Молдовадан өз алаңында ұтылған (1:2) ойынына кінәлілерді атады, деп хабарлайды ASnews.kz.

«Ұлттық құрама жеңілген кезде артынша кардиналды түрде өзгерістер орын алады. Өз алаңында Молдоваға жеңілсе, жағдай шынымен де алаңдатарлық деген сөз. Болар іс болды… енді кім қызметтен кетеді? Менде 3-4 адамнан тұратын кандидаттар тізімі бар:

Бірінші кандидат – бас бапкер Джон ван ’т Схип. Мақсат орындалмаған кезде бірінші болып бапкердің «басы» кетпей ме?

Екінші кандидат – Ұлттық құрамалар департаментінің директоры Руслан Балтиев. Күллі департамент жұмысына басшылық қылатын кісі осы жағдайға тікелей жауапты болуы керек емес пе? Оның үстіне U-19, U-21 екеуі де жаппай жеңіліп жүр. Сондықтан Руслан Тахирұлының креслосы шатқаяқтап қалғандай.

Келесі үміткер – Геннадий Скуртул. ҚФФ техникалық директорының басына қара бұлт үйіріліп тұрғаны бұрыннан белгілі. Бапкерлер даярлап, курстар өткізіп ел футболына үлес қосатын азаматтың жұмысында ілгерілеу жоқтың қасы. Молдовалық маманнан елдегі жас бапкерлер де мезі болып отырғандай. Егер молдовалық маман бізге футбол үйретсе, онда Молдовадан жеңілуіміз заңды құбылыс шығар!

Осыдан кейін үшеуі де жұмыста қалып, жұмысын жалғастыра береді дегенге сену қиын», – деп жазды Мәулен өзінің Telegram-арнасында.

Еске сала кетейік, 2 қазанда Қазақстан құрамасы УЕФА Ұлттар лигасының үшінші туры аясында «Астана Аренада» Молдова командасына 1:2 есебімен сенсациялық түрде есе жіберді. Джон ван ’т Схип шәкірттері үш матчтан кейін еншісіндегі бір ұпаймен С3 тобында соңғы орында келеді. Қазақстандықтар келесі ойынын 6 қазанда өз алаңында Фарер аралдары құрамасына қарсы өткізеді.

Молдовада Попескуді Қазақстан құрамасының бас бапкері етіп тағайындауды ұсынды