«Біз жеңуіміз керек еді»: Қазақстан қақпасына гол соққан ойыншы Ұлттар лигасындағы ойын туралы

Ұлттар лигасының алғашқы матчында (1:1) Қазақстан қақпасына жалғыз гол соққан Фарер аралдары құрамасы мен швециялық «Мьельбюдің» шабуылшысы Аки Самуэльсен ASnews.kz сайтына берген сұхбатында өткен кездесуді қорытындылады.

Қазақстанға қарсы жіберіп алған жеңіс туралы

«Менің ойымша, бүгін біз жақсы матч өткіздік, тамаша мүмкіндіктер жасадық, тамаша ойнадық және, меніңше, жеңіске жетуіміз керек еді. Біз тең түстік, бұл қалыпты жағдай. Алғашқы ойын үшін бұл жаман нәтиже емес, тең ойын жеңілістен әрқашан жақсы, бірақ біз үнемі жеңіске жеткіміз келеді. Әсіресе өз алаңымызда ойнаған кезде».

Турнирлік мақсаттар мен Молдоваға қарсы матч туралы

«Келесі матчта біз Молдоваға қарсы ойнаймыз. Және біз алаңға тек жеңіс үшін шығамыз. Бұл топта біз әр кездесуде тек жеңіске жетуді мақсат тұтамыз, алдағы ойын да бұған ерекшелік болмайды».

Конференциялар лигасындағы «Қайратқа» қарсы алдағы кездесу туралы

«Біздің клубта ұпай жинауға жақсы мүмкіндіктер бар деп санаймын. Біз әлі «Қайраттың» ойынын егжей-тегжейлі талдаған жоқпыз, бірақ мен олардың былтырғы Чемпиондар лигасындағы матчтарын көрдім. Демек, биыл маған Қазақстанға екі рет саяхаттауға тура келеді. Бұл өте ұзақ ұшулар, бірақ біз ол жақта да оң нәтижеге қол жеткізе аламыз деп үміттенемін».

Еске сала кетейік, Фарер аралдары мен Қазақстан құрамалары арасындағы Ұлттар лигасының бірінші тур матчы 1:1 есебімен тең аяқталды. 22 жастағы Аки Самуэльсен 14-минутта есеп ашқанымен, қонақтар Темірлан Ерлановтың голының арқасында таразы басын тез теңестірді.

Айта кетейік, футболшы атап өткен «Қазақстанға екі саяхат» осы күзде-ақ жүзеге асады. УЕФА Конференциялар лигасы аясында Алматыдағы «Қайратқа» қарсы матчқа дейін Самуэльсен Астанаға ұшып келеді – 6 қазанда Фарер аралдарының құрамасы Ұлттар лигасының төртінші туры аясында қазақстандық командаға қарсы қарымта ойын өткізеді.

«Ауа райы да, алаң да қиын болды»: Қазақстан құрамасының дебютанты Фарердегі тең ойын туралы