Белгілі неміс клубының шабуылшысы Қазақстан намысын қорғауға ниетті екенін айтты

«Санкт-Паули» U-19 командасының шабуылдаушы жартылай қорғаушысы Яннис Георгиади ASnews.kz сайтына берген сұхбатында Қазақстан құрамасында өнер көрсетуге дайын екенін жеткізді.

«Егер Қазақстанда спорттық азаматтық енгізілсе, мен бұл елдің намысын куана-қуана қорғар едім. Мұндай мүмкіндік болса – иә. Ал бүгінде Германияда жүріп, бұл елдің паспортынан оңай бас тарту қалай мүмкін? Басқалар да дәл осылай жауап берер еді», – деді жас футболшы.

Атап өтсек, Яннис Георгиади Германияда Жамбыл облысы тумасының отбасында дүниеге келген. Өткен маусымдағы 12 матчта ол бір гол соғып, үш нәтижелі пас берді.

Бұған дейін 18 жастағы жартылай қорғаушы «Гамбург» және «Хольштайн» академияларында өнер көрсеткен. Қазіргі таңда ол «Санкт-Паулидің» қосалқы командасымен бірге жаттығып жүр.

Еске сала кетейік, ҚР Конституциясына сәйкес, елде қос азаматтық танылмайды. Ұлттық құрама намысын қорғау үшін жергілікті паспорт қажет болғандықтан, екінші азаматтығы бар спортшылар халықаралық аренада өнер көрсету құқығынан айырылады.

Сонымен бірге спорттық азаматтық ұғымы Халықаралық футбол федерациясының басты құжаты – ФИФА Жарғысында ресми түрде бекітілген.