«Бұл күнді 40 жылға жуық күттік»: Қазақстан құрамасына үміткер – Грекия Кубогының иегері

ОФИ клубының қапталдағы қорғаушысы Илиас Хадзитеодоридис ASnews.kz сайтына берген сұхбатында Грекия Кубогының финалында ПАОК-ты жеңгеннен кейін (3:2) алған әсерімен бөлісті.

«Бұл менің мансабымдағы екінші трофей және ОФИ үшін оның маңызы өте зор. Өткен жылы 38 жылдан бері алғаш рет финалға шығып, «Олимпиакостан» (0:2) жеңілгенде қатты қапаланған едік. Ал биыл сол жетістікті қайталап, соңы сәтті аяқталды. Жанкүйерлер шексіз қуанышқа кенелді. Бұл сезімді сөзбен айтып жеткізу мүмкін емес», – деді 28 жастағы ойыншы.

Айта кетейік, ПАОК – Грекия Кубогының 8 дүркін иегері. ОФИ құрамы қарсыласынан алты есе арзанға бағаланған (96,83 млн-ға қарсы 15,2 млн еуро).

Илиас Хадзитеодоридис – қазақстандық репатрианттардың (грек диаспорасы) ұлы. 1990 жылдарға дейін футболшының отбасы Шымкент қаласында тұрған. Осы маусымда қорғаушы 24 матч өткізді. Бұған дейін ол «Арсенал», «Брентфорд» және «Панатинаикос» сапында өнер көрсеткен.