WhoScored сарапшысы: Чесноков «Хартсқа» әлі көмектеседі – уайымдаудың қажеті жоқ

WhoScored.com сарапшысы және Perth to Paisley подкастының авторы Адам Кеннеди ASnews.kz сайтына берген сұхбатында Ислам Чесноковтың «Хартстағы» жағдайын бағалады.

«Хартс» құрамында бір індет жайлағандай – футболшылар бірінен соң бірі жарақат алып жатыр, сондықтан құрам жиі өзгереді. Чесноковтың жағдайында бапкер бәрін дұрыс істеп отыр. «Фалкиркке» қарсы кубоктық матчта (пенальти бойынша 4:5) ол шаршаңқы күйде көрінді, екінші жағынан – чемпионатта дәл осы командаға гол соқты (1:0). Исламның командаға титул үшін таласта әлі көмектесетініне күмәнім жоқ. Оң қанаттағы вингер позициясы бос, сондықтан барлығы оның өз қолында», – деп атап өтті сарапшы.

Естеріңізге сала кетейік, қазақстандық вингер Ислам Чесноков шотландиялық клубқа жыл басында қосылған болатын. Соңғы үш ойында футболшы алаңда бар-жоғы 51 минут өткізіп, ұлттық құраманың бас бапкері Талғат Байсуфиновтың наразылығын тудырды.

31 турдан кейін «Хартс» чемпионат кестесін бастап тұр, олар «Рейнджерс» командасынан бір ұпайға озып келеді.