Исламхан «Зенитке» ауыса алмауының себебін түсіндірді: ол жаққа «Әл-Айннан» кейін бармақшы болдым

Қазақстан құрамасының бұрынғы капитаны Бауыржан Исламхан ASnews.kz сайтына берген сұхбатында Санкт-Петербургтің «Зенит» командасында қаралымнан өткен кезін еске алып, Ресей чемпиондарымен бірге ойнауына не кедергі болғанын түсіндірді.

«Мен «Зенитте» қаралымда болдым. Онда жақсы өнер көрсеттім, бірақ бір мәселе болды – мен сол кезде легионер болып саналдым. Осы жағдай әсер етті. Қаңтарда «Әл-Айнмен» алты айлық келісімшартқа отырдым, жазда «Зенитке» ауысамын деп ойладым. Бірақ маусым айында олар маған ұсыныс жасамады, сондықтан БАӘ клубымен келісімшартымды ұзарттым», – деді Исламхан.

Футболшы сонымен қатар Ресей футбол ережелерінің өзгеруіне өкінішін білдірді:

«Бір жылдан кейін жаңа ережелерге байланысты мені Ресейде шетелдік ойыншы деп санамайтыны өкінішті болды».

Исламхан 2020 жылдың қысында Сергей Семактың басшылығымен «Зенит» сапында жаттықты. Көп ұзамай, 2020 жылдың жазында Ресейдің Спорт министрлігі ЕАЭО елдерінен келген (соның ішінде Қазақстан) футболшылардың ресейлік турнирлерде легионер болып есептелмейтінін мәлімдеді.

Бұған дейін Бауыржан осы жылдың басында қазақстандық клубтардың ұсыныстарынан бас тартуының себебін түсіндірген болатын.