«Мақсатым – Қазақстан намысын қорғау»: ҚПЛ-дың жаңа жұлдызы Дадаев – «Алтай», «Ақтөбенің» қызығушылығы және құрама туралы

«Алтай» – ҚПЛ-дағы бюджеті ең аз командалардың бірі, олар небәрі бес тур бұрын жарыс кестесінің соңында тұрған еді. Алайда Вахид Масудовтың шәкірттері жағдайды түзеп, «Ақтөбе» мен «Тобылды» жеңгеннен кейін де таңғалдыруды жалғастыруда. Бұған 24 жастағы вингер Ибрагим Дадаевтың да септігі тиді.

ASnews.kz сайтына берген сұхбатында «Қайраттың» түлегі мына тақырыптар төңірегінде ой қозғады:

• Өскемендіктердің киім ауыстыратын бөлмесіндегі атмосфера;

• «Ақтөбеге» ауыспай қалуының себебі;

• Қазақстан ұлттық құрамасына шақырту алу.

– Ибрагим, бәсекелес «Қайсарды» жеңулеріңізбен құттықтаймыз (2:0). Маусым аяғындағы кезеңде команда өзін қалай сезінуде?

– Рақмет. Бұл өте маңызды жеңіс деп санаймын – жарыс кестесінен көріп отырғандарыңыздай, командалар бір-біріне өте жақын орналасқан. Бұл жеңіс бізге эмоционалды серпін берді. Қазір бәрінің көңіл-күйі көтеріңкі.

– «Алтай» – амбициясы жоғары, бірақ жас клуб. Киім ауыстыратын бөлмеде және алаңда кімді көшбасшы деп атар едіңіз?

– Әркімнің бойында өзінше көшбасшылық қасиеттер болуы керек. Бізде керемет атмосфера қалыптасқан, қақпашыдан бастап шабуылшыға дейін осындай жауапты кезеңде өзін көрсетуге міндетті. Бұл – ҚПЛ-дағы орнымызды сақтап қалу жолындағы соңғы ойындар.

Факт: Бір ай ішінде «Алтай» «Ұлытау», «Ертіс», «Каспий» және «Атырау» командаларымен ойнайды.

– Осы маусымдағы ең жарқын сәттердің бірі – Кубоктың ширек финалында «Ақтөбені» жеңгендеріңіз (1:1, пенальти бойынша 4:3). 12 мың жанкүйердің көз алдында пенальти нүктесіне жақындағанда қандай сезімде болдыңыз?

– Шынымды айтсам, бұл сөзбен жеткізуге келмейтін сезім. «Қобыландыда» мұндай атмосферада ойнау – керемет. Допқа қарай бет алғанда аздап қобалжыдым, бірақ оны нүктеге қойған кезде құдды бір киноға түсіп жатқандай болдым. Миым өшіп қалғандай болды. Ал соққының өзі – шеберліктің еншісіндегі дүние.

– Маусым айында сіздің «Ақтөбеге» ауысуыңыз жайлы ақпарат тарады. Бұл трансфердің жүзеге асуы қаншалықты жақын болды?

– Иә, БАҚ-та бұл трансфер туралы көп жазылды. Бәрі соңғы сәтте өзгерді. Сырт алаңдағы өзара матчтан кейін басшылықпен сөйлесуге кірдім, сөйтіп «Алтайда» қалғаным дұрыс болады деген шешімге келдік. Бұл ортақ шешім болды. Дегенмен «Ақтөбеге» бару мүмкіндігім жоғары, шамамен 70% болған еді.

– Бұған дейін сіз Сэйф Попов, Сергей Иванов және Жаннұр Көкеевпен бірге «Қайрат» сапында ойнадыңыз. Ойындағы және өмірдегі байланыстарыңыз туралы айтып берсеңіз.

– Төртеуіміз де – «Қайраттың» түлегіміз. Үнемі бірге жүреміз. Біздің қарым-қатынасымыз шынымен өте жақсы, әсіресе Поповпен байланысымыз ерекше. Өткен жылы Өскеменге келген кезім есімде, сол кезде екеуіміздің арамызда бірден мықты байланыс орнады. Базада бір бөлмеде тұратын болдық.

Факт: Бірінші лиганың өткен маусымында Дадаев 13 гол соқты. Одан көп гол тек Мирас Тұрлыбектің еншісінде ғана (23) бар.

– Кейбір жанкүйерлер сізді ұлттық құраманың кеңейтілген тізімінен көреміз деп үміттенді. Қазақстан намысын қорғау сіз үшін нені білдіреді?

– Бұл үлкен мәртебе. Құрамаға ілігу – болашаққа қойған басты мақсаттарымның бірі. Егер осындай мүмкіндік туса, қатты қуанамын. Иә, кеңейтілген тізімге ілігу жақсы, бірақ бәрінің өз уақыты бар. Менің де кезегім келетін күн туар.

– Шешен жігітіне тән емес ерекше стиліңіз бар: ұзын шаш, шашқа тағатын таңғыш, сәнді гетрлер. Әрдайым өзіңізді осылайша ерекше көрсетіп пе едіңіз? Бәлкім, бала кезіңізде қандай да бір футболшыларға еліктеген шығарсыз.

– Ұзын шашыммен шешендердің арасында ерекшеленіп тұратынымды түсінемін (күледі). Кейде ойыма бірдеңе келе қалады: қаласам – таңғыш тағып аламын немесе гетриімді түсіріп киемін. Өзімді осылай көрсетемін деп айтуға болады. Осы үшін мені Витиньяға ұқсататынын жиі естимін.

«Галатасарайдағы» қазақстандық қорғаушы: Қазақстан құрамасындағы ойыным ауысуыма көмектесті