«Галатасарайдағы» қазақстандық қорғаушы: Қазақстан құрамасындағы ойыным ауысуыма көмектесті

«Галатасарайдың» 19 жасқа дейінгі командасының қазақстандық қорғаушысы Джан Ходжаоглу ASnews.kz сайтына берген сұхбатында түрік клубына қалай ауысқаны туралы айтып берді.

Алғашқы әсерлер

«Шынымды айтсам, «Галатасарай» – менің бала күнгі армандаған клубым. «Сьонда» жүргенімнің өзінде олардың матчарын үнемі тамашалайтынмын. Бұл сезімді сөзбен жеткізу мүмкін емес. Өйткені былтыр ғана теледидардан қарап, тәнті болған футболшылармен аптасына бір рет бірге жаттығамын. Бұл – қосалқы команда үшін қалыпты тәжірибе.

Келісімшартқа қол қоюға бір айға жуық уақыт кетті. Олар менің сәттерім көрсетілген видеоларды (хайлайттар) көріп, қаралымға шақырды. Төртінші жаттығуда ерекше сенімді өнер көрсеттім, содан кейін мамандар ауысымды тезірек рәсімдеу үшін құжаттарды сұратты», – деді Ходжаоглу.

Қазақстан құрамасы Түркияның үздік академиясына жетеледі

«Бұл процесс біраз стресс тудырды, өйткені олар әрбір жаттығуға менің әрекеттерімді бақылайтын төрт скауттан жіберіп отырды. Соның кесірінен қосымша қысымды сездім, егер келісімшартқа лайық екенімді дәлелдей алмасам, еркін агент болып қалар едім.

Трансфер жасалған күні менімен бас бапкер мен скаут келіп сөйлесті. Біз көп нәрсені талқыладық. Бапкер мені тірек жартылай қорғаушысы – «алтыншы нөмір» ретінде көретінін айтты. Қазақстан U-17 құрамасының жолдастық матчын қарап шыққаннан кейін ол менің қалай прессинг жасайтыныма және эпизодтарды қалай болжайтыныма тәнті болыпты».

Бастысы – асықпау

«Скаут қызметінің басшысы бойымды (186 см – ред.) және алаңның ортасында допты тартып алу қабілетімді атап өтті. Болашақта мықты тірек жартылай қорғаушысы болуға әлеуетім бар екенін мойындады. Бірақ әзірге маған бабыма келу үшін бір жарым ай уақыт беріліп отыр.

Командамен бірге маусымалды дайындықты өткізбегендіктен, жеке бапкерлердің көмегімен және қосымша жеке жаттығулар арқылы физикалық бабыма келемін. Ал содан кейін негізгі құрамда орнығу үшін қолдан келгеннің бәрін жасаймын», – деп қосты ол.

Еске сала кетейік, Қазақстан жасөспірімдер құрамасының футболшысы Джан Ходжаоглу енді Аламгир Смаков («Бешикташ») пен Диярхан Қарабалинов («Аланьяспор») өнер көрсететін дивизионда сынға түседі. Үш турдың қорытындысы бойынша «Галатасарайдың» қосалқы командасы жарыс кестесінде көш бастап тұр.

Бұған дейін номиналды қаптал қорғаушысы швейцариялық «Сьон» сапында ойнап, 10 матч өткізген болатын.