«Ақтөбе» футболшысының ұлы «Спортинг» академиясымен келісімшартқа отырды

«Ақтөбе» вингері, Португалия құрамасы мен «Манчестер Юнайтедтің» бұрынғы жұлдызы Луиш Нанидің ұлы – Лукас да Кунья – лиссабондық «Спортинг» U-14 командасының ресми түрде ойыншысы атанды, деп хабарлайды ASnews.kz.

39 жастағы португалиялық ардагер әлеуметтік желіде бұл қуанышты оқиғамен бөлісіп, ұлына ақ тілегін білдірді:

«Өзіңе жақсы таныс үйдегі жаңа шытырман оқиға! Бірақ бұл жолы бәрі сәл салмақтырақ әрі шынайырақ. Саған айтарым тек біреу: ойыннан ләззат ал және барыңды сал, ал қалғанын Құдайға тапсырайық. Ол сені әлемнің төрт бұрышында да қолдап, әр қадамыңа жарық берсін. Бақытты әрі баталы бол – кім болып қалыптассаң да, біз сені әрдайым қолдау үшін қасыңнан табыламыз. Әкең сені жақсы көреді», – деп жазды Нани өзінің әлеуметтік желідегі парақшасында.

Айта кетейік, Лукас да Кунья әкесінің жолын қуып, қапталдағы шабуылшы позициясында өнер көрсетеді.

39 жастағы Луиш Нани ең үлкен танымалдылыққа «Манчестер Юнайтед» сапында қол жеткізді, онда 230 матч өткізіп, төрт рет АПЛ чемпионы атанды және Чемпиондар лигасын (2008) жеңіп алды. Португалия құрамасы сапында хавбек 100-ден астам ойын өткізіп, 2016 жылғы Еуропа чемпионы атанды.

2026 жылдың қаңтарында португалиялық футболшы мансабын қайта жаңғыртып, ақтөбелік клубпен келісімшартқа отырды. 2026 жылдың тамызында «Қайсарға» қарсы ойында Нани кәсіпқой деңгейдегі 750-ші матчын өткізіп, жеңіс голымен және нәтижелі пасымен көзге түсті.

«Ақтөбе» бас бапкері қарсыластарының бір-біріне ойынды беріп қоятынын айтты