«Ақтөбе» Томас Гроннемаркке жауап берді: клуб қарыз туралы мәлімдемеге пікір білдірді

«Ақтөбе» футбол клубы ASnews.kz басылымына берген мәлімдемесінде «Ливерпульдің» бұрынғы стандартқа жауапты бапкері Томас Гроннемарктің ақпандағы оқу-жаттығу жиыны үшін ақша төленбегені туралы шағымына қатысты жағдайды түсіндірді.

«Біз Томаспен хабарластық. Әзірге оған ақша төлеуге құқықтық негіз жоқ, өйткені келісімшарт бұрынғы басшылық тұсында жасалғанымен, біз оларды таба алмадық. Төлем жасау үшін заңды негіздер керек.

Қазір бұл тығырықтан шығу жолдарын қарастырып жатырмыз – жаңа келісімшартқа отыру немесе мәселені шешудің басқа да нұсқасын табу. Таяу арада бұл сұрақ шешіледі, үрейленуге еш себеп жоқ. Бұрынғы басшылықтың тұсында қандай шарттармен жұмыс істелгенін әлі білмейміз. Оның да қолында сол кезде жасалған келісімшарт табылмады», – деп мәлімдеді «Ақтөбедегілер».

Бұған дейін 50 жастағы даниялық маман Томас Гроннемарк ASnews.kz-ке берген сұхбатында «Ақтөбе» Түркияда өткізген оқу-жаттығу жиыны үшін өзіне 5 мың долларға жуық ақшаны төлемей, байланысқа шығуды тоқтатқанын хабарлаған болатын.