«Қызайбаев сөзіне абай болуы керек»: эксперт «Ордабасы» басшысын ақтөбеліктер туралы айтқан сөзі үшін сынға алды

Футбол сарапшысы Рымбек Ізғали «Ордабасы» ФК директорлар кеңесінің төрағасы Дархан Қызайбаевтың «Жеңіске» қарсы матчтан (1:1) кейін айтқан мәлімдемесін сынға алды, деп хабарлайды ASnews.kz.

Бұған дейін шымкенттік клубтың басшысы «ақтөбеліктер Шымкент халқын ренжітіп алды» деп мәлімдеген болатын. Ізғали мұндай жалпылама айыптаумен келіспейтінін білдіріп, функционердің бұл сөзі салдарынан Ақтөбенің қарапайым тұрғындары, соның ішінде футболға еш қатысы жоқ егде жастағы адамдар да себепсіз айыпты болып қалғанын атап өтті.

«Ресми тұлғаның сөз таңдамай, абайламай сөйлеуі әртүрлі үлкен резонанстарға әкеліп жатады. Кім жаңылмайды. Бәрін түсінемін, әсіресе футбол эмоцияға толы спорт. Әлемдік деңгейде жаңылысатындар көп. Бірақ қатесін түсініп тұрса да, өзі біліп, алдын ала кешірім сұрау үшін үлкен шу болуы міндетті ма? Әлде Дархан Қызайбай өзінің шын ойын айтты ма?» – деп жазды Ізғали.

Шымкенттік клуб басшысының бұл сөзі 2026 жылдың 17 қазанында «Ақтөбе» мен «Ордабасы» арасындағы матчта (1:3) орын алған оқиғамен байланысты. Ол кезде кәмелетке толмаған жанкүйер қыздар трибунада «No Shymside, No Texas fans» деген жазуы бар және Өзбекстан туы бейнеленген баннерді жайып жіберген еді. Тексеру қорытындысы бойынша құқық қорғау органдары перформанс авторларының ата-аналарын ҚР ӘҚБтК-нің 127-бабы (балаларды тәрбиелеу бойынша міндеттерді орындамау) бойынша әкімшілік жауапкершілікке тартып, айыппұл салды.