«Омонияны» жеңгіміз келеді»: «Қайраттың» жаңа ойыншысы – «Ордабасыны» ұтуы және ЧЛ матчы туралы

Алматылық «Қайраттың» португалиялық жартылай қорғаушысы Гуштаву Мендонса ASnews.kz сайтына берген сұхбатында шымкенттік «Ордабасыны» жеңгеннен кейінгі (2:1) әсерімен бөлісті.

«Маған стадиондағы атмосфера өте ұнады: лық толы трибуналар мен жанкүйерлердің ыстық қолдауы керемет болды. Осы клубта өнер көрсетіп, негізгі құрамдағы алғашқы матчымды өткізгеніме өте қуаныштымын.

Кипрдегі «Омонияға» қарсы өткен ойынға келер болсақ, онда сәтсіз сәттеріміз болғаны жасырын емес. Бірақ қазір даму үшін және жеңіске жету үшін бәріміз бір ұжым болып жұмыс істеп жатырмыз.

Ал менің бейімделуіме келетін болсақ, ол өте жеңіл өтті, өйткені бразилиялық және португалиялық жігіттер маған күн сайын көмектесіп жатыр. Мұнда бәрі көңілімнен шығады», – деді Мендонса.

Алматылық «Қайрат» өз алаңында ҚПЛ-дың 19-турындағы орталық матчта шымкенттік «Ордабасыны» 2:1 есебімен жеңді. Жеңімпаздар сапында Марк Гуаль мен Ойва Юккола гол соқса, қонақтар сапынан кездесу соңында Бьорн Йонсен мергендік танытты. Осы жеңістің арқасында алматылықтар 45 ұпай жинап, шымкенттіктерді (43 ұпай) турнирлік кестенің бірінші орнынан ысырып тастады.