ПСЖ-ның бұрынғы ойыншысы Қазақстандағы академия туралы: бұл – керемет идея

ПСЖ мен Кот-д’Ивуар құрамасының экс-шабуылшысы Франк Джа Джедже ASnews.kz сайтына берген сұхбатында париждік клуб академиясының Қазақстанда ашылу ықтималдығына қатысты пікір білдірді.

«Академияның ашылуы – ПСЖ үшін де, қазақстандықтар үшін де керемет идея, себебі осылайша олар көзге түседі. Өкінішке қарай, Ресей мен Шығыс Еуропа елдерін есептемегенде, ҚПЛ Еуропада аса танымал емес. Меніңше, бұл өте жақсы жаңалық», – деді 40 жастағы африкалық футболшы.

Еске сала кетейік, жергілікті БАҚ-тың мәліметінше, ПСЖ Астанада өз академиясының негізін қалау мүмкіндігін қарастырып жатыр. Өткен жылы елде әлемге әйгілі «Атлетико» клубының орталығы ашылған болатын.

Франк Джа Джедже француздық ұжым сапында 2003–2007 жылдар аралығында өнер көрсеткен. Сонымен қатар ол қазақстандық «Ертіс» пен «Қайсар» клубтарында да ойнап, жеті гол соғып, төрт нәтижелі пас берген.