«Топ-клуб менталитетін қайтару керек»: Ромащенко «Оқжетпеспен» өткен ойын, Марат және КЛ туралы

«Тобылдың» бас бапкері Мирослав Ромащенко ASnews.kz тілшісіне берген сұхбатында «Оқжетпесті» (3:1) жеңгеннен кейінгі өзекті сұрақтарға жауап берді.

Шабуылшылар ақыры қуантты ма?

«Командамен шабуылдағы ойынды жиі талқылаймыз, өйткені тактикада тым болжамды болып барамыз. Соңғы матчтарда – әсіресе сырт алаңда – тек орталықтан шабуылдадық. Ал бізге жан-жақты болу керек.

Бүгін «Тобыл» өткен турға қарағанда әлдеқайда жақсы ойнады. Алайда, бұл одан да сауатты өнер көрсету жолындағы алғашқы қадам ғана», – деді 52 жастағы маман.

Үздік үштіктегі клубты жеңсе де, неге бөріктерін аспанға ату ерте?

«Әр ойыннан кейін жерге түсіп, келесі жеңіске бапталамыз. Кирилл Глущенков команданы азшылықта қалдырған «Ордабасымен» кездесуді (0:3) қоспағанда, біз өз алаңымызда бірде-бір рет жеңілген жоқпыз. Енді осы көзқарасты сырт алаңдағы ойындарға да көшіру қажет.

Психология – өте маңызды нәрсе. Футболшылар мұны түсінуі тиіс, өйткені алаңға шығатын – солар. Сеніңіздер: дайындық процесі дерлік өзгермейді. Біз қарсыластарды кәсіби түрде талдап, физикалық жағдаймен жұмыс істейміз, бірақ топ-клуб менталитетін қайтаруымыз керек».

Дамир Мараттың «Астанаға» ауысуы қалай болды?

«Біріншіден, Маратпен жеке көп сөйлестік. Мен оның ниетін түсіндім, бұл қалыпты жағдай – ол көбірек ойын тәжірибесін алғысы келеді. Белгілі бір себептерге байланысты «Тобыл» Дамирге қажетті ойын уақытын бере алмады, сондықтан ойыншылар тапшылығына қарамастан оны жіберу туралы шешім қабылданды.

Басшылық екеуміздің ойымызша, бұл орынды шешім, өйткені жігіттің көзі жанып тұрды. Оны ұстап отырудың мәні жоқ еді».

Сенхаджидің голы мен жарақаты туралы

«Алдын ала мәлімет бойынша, айтарлықтай қауіпті ештеңе жоқ. Ертең Сенхаджи қосымша тексеруден өтеді. Ал ойын сапасына келсек, біреуді жеке бөліп айтқанды ұнатпаймын – бәріміз де күшеюіміз керек. Қай тұста даму қажеттігін көріп отырмыз.

Екінші жағынан, бәрі бірден болмайды: бізде әлі бір арнадан екінші арнаға толық ауысып үлгермеген, өтпелі кезеңде жүрген ойыншылар бар. Жігіттерге уақыт берейік. Қалғаны үшін Устименко бар.

Киім ауыстыратын бөлмедегідей, Райанды тамаша дебюттік голымен құттықтаймын. Кейде шәкірттерім үшін көбірек қуанғым келеді, өйткені олар турнирлік кестеде бұдан да жоғары тұруға лайық. Маусым басынан бері аяқтан шалған келеңсіздіктер артта қалды деп үміттенемін».

«Атырауға» қарсы матч кейінге шегеріле ме?

«Бұл мәселе талқыланып жатыр. Күнтізбе тақырыбына әлі ораламыз. Еурокубок кампаниясының басталуына дайындалу үшін бізге көбірек уақыт қажет болғандықтан, «Қызылжармен» өтетін кездесу бір күнге шегерілді», – деп қосты ол.

Еске сала кетейік, ҚПЛ-дың 17-турында «Тобыл» Асхат Тағыберген, Райан Сенхаджи және Луис Герраның голдарының арқасында «Оқжетпесті» басып озды. Осылайша қостанайлықтар кестеде 13-орыннан 11-орынға көтерілді.

Дәл осы ойыннан кейін «Оқжетпес» Қазақстан премьер-лигасының соңғы матчтарындағы төрешілердің шешімдеріне көңілі толмайтынын ресми түрде мәлімдеген болатын. Көкшетаулық клуб ойын сәттеріндегі ережелердің бұрыс түсіндірілуіне байланысты ҚФФ төрелік ету және инспекциялау департаментінің басшысы Нуну Каштрумен кездесу өткізуді жоспарлап отыр. Клубтың баспасөз қызметі таратқан мәліметке сүйенсек, федерация басшылығы туындаған сұрақтарға жеке кездесу барысында жауап беруге уәде берген.

Қағаз жүзіндегі күнтізбеге сәйкес Мирослав Ромащенконың командасы 26 шілдеде «Атыраумен» кездесуі тиіс. Ал 23 және 30 шілдеде Конференция лигасының екінші іріктеу кезеңі аясында литвалық «Паневежиспен» ойнайды.