«Ордабасы» легионері Әмір туралы: оның ерекше екенін бірден түсіндім

«Ордабасының» жартылай қорғаушысы Тидиан Кейта ASnews.kz тілшісіне берген сұхбатында Жасұлан Әмірді «Страсбур» мен Марокко құрамасының 20 жастағы шабуылшысы Жессим Яссинмен бір қатарға қойды.

«Жесс – ерекше талант иесі. Аяқпен керемет жұмыс істейтін және өте епті, тамаша дриблер. «Дюнкерктегі» екінші жаттығудан кейін-ақ: "Бұл жігіттің бойында бір ерекшелік бар», – дегенім есімде. Қызығы сол, мұнда Әмірді көргенде де тура осындай ойға келдім.

Жасұлан – физикалық тұрғыдан жақсы жетілген, қазірдің өзінде нәтижелі ойнап жүрген футболшы. Бірақ Яссин екеуін жауынгерлік мінез бен қарапайымдылық біріктіреді. Шынымды айтсам, олардың әлеуетінің шегі қандай екенін де білмеймін. Меніңше, оның шегі жоқ сияқты», – деді 29 жастағы француз легионері.

Жессим Яссин – Тидиан Кейтаның Францияның 2-лигасындағы бұрынғы командаласы. Биыл жас вингер танымал «Страсбур» клубымен келісімшартқа отырып, Марокко құрамасының сапында өзінің алғашқы әлем чемпионатына аттанды. Бұған дейін ол 20 жасқа дейінгі командалар арасында әлем чемпионы атанған болатын.

19 жастағы Жасұлан Әмір дарын иесінің еншісінде биылғы маусымда өткізген 20 матчта тоғыз гол мен бес нәтижелі пас бар. Айта кетейік, ресейлік «Балтика» клубы ол үшін үш миллион еуро ұсынған еді.