Абраевтың өкілі: бұл оның «Астанадағы» алғашқы маусымы екенін ұмытпаңыздар

GRCG агенттігінің негізін қалаушы Ербол Еділов ASnews.kz сайтына берген сұхбатында Мақсат Абраевтың «Жеңіске» қарсы ойынына (1:0) қатысты пікір білдірді.

«Астананың» бапкерлер штабы да, жеке өзім де Абраевтың босаңсуына жол бермейміз – ол басын жоғалтпай, жұмысын жалғастыруда. «Ақтөбеге» қарсы ойыннан (0:2) кейін арамызда маңызды диалог болды, тіпті оны ұрысқандай болдық. Бірақ ұмытпайық: бұл 18 жастағы жігіт үшін дебюттік маусым.

Мақсаттың негізгі құрамға ілінуі – Жаратқанның бұйрығы. Клубтың Камарамен қоштасуға мәжбүр болып, жиындарда кенеттен «Спартакты» сан соқтырған өз тәрбиеленушісіне сенім артатынын кім болжаған? Сантананың жоқтығын сәтті пайдаланған Сәтпаевқа қатысты да осыны айтуға болады», – деді Еділов.

Еске сала кетейік, ҚПЛ-дың 16-турында «Астананың» вингері Мақсат Абраев «Жеңіс» қақпасына жеңіс голын соққан болатын. Осы маусымда 18 жастағы қазақстандық үш гол соғып, үш нәтижелі пас берді.

Айта кетейік, шабуылшы мансабын «Брюггеде» жалғастыруы мүмкін. Сондай-ақ, Бельгия мен Нидерландының үш клубы қызығушылық танытып отыр. Оның трансферлік құны 1 млн еуроға дейін өсті.