«Портудың» экс-футболшысы: үш клубқа Латурнусты бақылауды ұсындым

«Ақтөбенің» бұрынғы скауты Шаинью ASnews.kz сайтына берген сұхбатында 17 жастағы Виталий Латурнустың қызметін «Порту» клубына ұсынғанын айтты.

«Алғашқы күні-ақ Латурнустың ерекше екенін түсіндім. Оған «Ақтөбеде» мүмкіндік алу өте маңызды болғаны сөзсіз. Уақыт көрсеткендей, басшылық өз түлегіне сенім артып, дұрыс шешім қабылдады. Ол – жаңа нәрселерді үйренуге құштарлығы зор, қарапайым әрі еңбекқор жігіт.

Әрине, ҚПЛ деңгейі өсіп келеді, сапалы ойыншылардың шығып жатқанын байқауға болады. Бірақ мен Виталийдің кандидатурасын үш клубқа ұсынуды жөн көрдім. «Порту» – солардың бірі», – деді 51 жастағы маман.

Есеесала кетейік, «Порту» мен «Панатинаикостың» экс-футболшысы Шаинью биылғы жылдың наурыз-сәуір айларында «Ақтөбеде» жұмыс істеген болатын. Скаутты «ақ-қызылдардың» бұрынғы басқарма төрағасы Арман Оспанов шақырған еді.

Осы маусымда Виталий Латурнус барлық жарыстарда 14 матчқа қатысты. Жас шабуылшының еншісінде төрт гол мен екі нәтижелі пас бар.