«ҚПЛ күшейіп келеді»: жас шабуылшы Еуропадан Қазақстанға оралғысы келеді

Испаниялық «Сеута» клубының бұрынғы шабуылшысы Данил Анкудинов ASnews.kz сайтына берген сұхбатында болашаққа құрған жоспарларымен бөлісті.

«Испанияның үшінші дивизионынан қызығушылық бар, бірақ менің басымдығым – ҚПЛ. Қазір бірнеше отандық клуб қызығушылық танытып отыр. Қазақстандық ретінде ұлттық құрама бапкерлерінің назарында болғым келеді, оның үстіне чемпионаттың деңгейі де өсіп келеді.

Егер алдағы екі маусымды сәтті өткізсем, Испанияға қайта оралуға болады, тіпті бұдан да жоғары лигаға ауысуға мүмкіндік туады. Жас ерекшелігім де бұған әбден сай келеді», – деді 22 жастағы форвард.

Қарағанды футболының түлегі Данил Анкудинов өткен маусымды «Сеутаның» қосалқы құрамында өткізді. Шабуылшы 30 матчта жеті гол соғып, үш нәтижелі пас берді. Бұған дейін ол молдовалық «Шериф», литвалық «Джюгас» және беларусьтік «Днепр» клубтарында доп тепкен.