«Ұлытау» шабуылшысы жеңіліссіз серия туралы: Мазбаев Магат емес, бірақ оның әдістеріне сенеміз

«Ұлытау» клубы мен Никарагуа құрамасының шабуылшысы Ариагнер Смит ASnews.kz сайтына берген сұхбатында жезқазғандық ұжымның өз алаңындағы жеңіліссіз сериясы туралы пікір білдірді.

«Мұның құпиясы – бір ұжым болып жасалған жұмыста. «Ұлытау» – үлкен бір отбасы. Өз үйімізде жанкүйерлердің қолдауының арқасында өзімізді сенімдірек сезінеміз. Әрине, жасанды төсеніш бізге де әсер етеді, бірақ біз әр матчқа тек бір ғана мақсатпен шығамыз, ол – жеңіске жету.

Сондай-ақ жеңістің кілтін таба білетін бапкердің де рөлін атап өткім келеді. Мазбаев бапкер Феликс Магат сияқты тым қатал емес пе? Жоқ, бірақ біз оның жұмыс әдістеріне сенеміз және айтқанына құлақ асамыз», – деді никарагуалық форвард.

ҚПЛ-дың 13-туры аясында өткен «Жеңіске» қарсы матчта «Ұлытау» маусымдағы алтыншы жеңісіне қол жеткізіп, үздік бес команданың қатарына қайта оралды (2:1). Нұркен Мазбаевтың шәкірттері биыл «Металлург» стадионында бірде-бір рет жеңіліс дәмін татқан жоқ.

27 жастағы Ариагнер Смит осы маусымда 13 ойынға қатысып, екі гол соқты және екі нәтижелі пас берді. Бұған дейін шабуылшы ресейлік «Велес» және литвалық «Паневежис» клубтарында доп тепкен.