«Ақтөбенің» жаңа жұлдызының әкесі: Виталийдің басы айналып, асқақтап кетпейді

Виталий Латурнустың әкесі Артем ASnews.kz тілшісіне берген сұхбатында «Ақтөбенің» 17 жастағы шабуылшысының айналасындағы үлкен ажиотажға қатысты пікір білдірді.

«Виталий – жас болса да, өз жасына қарағанда өте салмақты әрі ерте есейген. Ешқандай себепсіз жаттығуларды ешқашан жіберген емес, мектепте де өте жақсы оқыды, сондықтан тәртібі өте жоғары. Жетістіктен басы айналып, асқақтап кету оның табиғатына жат. Ұлым қазір де нәтиже көрсетіп жатыр, алдағы уақытта да көрсете береді», – деді Латурнустың әкесі.

«Ақ-қызылдардың» жас форварды Виталий Латурнус ҚПЛ-дың 12-турында «Оқжетпеске» қарсы өткен матчта (2:2) дубль авторы атанған болатын. Бұған дейін ол «Атырау» қақпасын да дәл көздеген (1:1).

Футболшы маусым айында өтетін Еуропа чемпионатының іріктеу кезеңі аясындағы Португалия, Сербия және Грекияға қарсы ойындарда Қазақстан U-19 жасөспірімдер құрамасына көмектеседі.